İqbal Əbilovi dastqirəti mıddət 4 manq dıroz kardə be

Noyabri 19-də Boku şəhəri Səbail Rayon Məhkəmə tolışə fəol, tədğiğatəkə İqbal Əbilovi bo sıftənə istontoğe ro dastqirəti mıddətış həniən 4 manq-tosə omə sori martə manqi 22 dıroz band istintoğe təğdim kardə  vəsotətış təmin kardə. Bın barədə fəoli vəkil Rovşanə Rəhimova bəyonış kardə.

Məhkəmə Əbilovi dastqirətiədə oğəte ro çəy Bokuədə jimon kardə vırə nı be, çəy ozodətiədə be bə istontoğe təsir karde, Azərboyconiku beşe əsosonış vardə. Mıdafiə tərəf Əbilovi dastqirətiədə oğəte, bə cinoyət məsuliyyət cəlb karde beəsos hisob kardə. Əbilovi ıştənən bə çəy vəynə doə ittihomon rədd kardəşe. Vəkil məhkəmə çın ğəroriku apellyasiya şikot eçın qəte fikədə be votəşe.
Belorusədə jimon kardə, tovostonədə bə Azərboycon bə istə əvlodi vəyə omə İqbal Əbilov iyuli 22-də bə devləti xəyonət,  de xarici təşkiloton və ya de çəvon numayəndon asparde bə devləti vəynə ictimai vanqon və milli, irği, sosial və ya dini nifrət və deşmenəti tosbone maddon ittihomi dastqir kardə bə.
In cinayoton de Erməniston xususi xıdmət orqanon asparde karde iddio bedə. 
Əbilov ittihomon rədd kardə və bəyon kardə ki, əv de elmi fəoliyyəti məşğul bə.
 Dınyo muxtəlif keşvəronku bə alimon bə Azərboycon rəhbərəti ovardən, Əbilovun ozod karde komək be xahiş kardəşone. Huğuğ mudafiəvonon İqbal Əbilovşon bə siyosi məhbusi zınə.