De polis rəisi xanbozətiş karde, dastqir be 

Xaçmaz rayon əji, istə ğarzi piye ro şər ğandə be votedə.

“Tosə bə əvon rast ome çımı koon çok şedə bin. Vindıme ki, həmmə bəmı ğarzoxon, de əvon ko karde mumkun ni, istə pulonım peğəte çəvonku diyəro be pime, çımı pulon oqordone əvəzi, mınşon dastqir karde”.
In sıxanon dırozə mıddət Xaçmazədə de taxıl biznesi məşğul bə, dastqirətiku tojə beşə Ceyhun Əsqərov votəşe.
Əv Xaçmazədə jidə, de soybkoəti fəoliyyəti məşğule. De çəy vote, de Xaçmazi ro polisi rəis bə, holiədə Siyəzən polisi muhafizə xıdmətədə ko kardə Elnur Quliyevi xanboz ko kardəşone. Elnur Quliyev bəy ğarzoxo mandə. Ceyhun Əsqərov istə ğarzi tələb kardeədə, navkonə xanboz de dastqirəti ğarz sehbəti dəparçıniye piyəşe.  
Ceyhun Əsqərov votedə ki,  Elnur Quliyevi bənkonədə bəy məxsus zəmin iyən maşin qirov oğəte ğarz bə 470 həzo mənot rəşə bə peş, çəyku 2023-minə sorədə bə Dılətonə Koon Vəzorət şikot kardəşe. Vəzarəti Dılətonə Təhğiğat İdorəku bə rayon omə numoyəndə 2-3 manq hovsələ karde, ğarz oqordonə bəbe bıvotoən, hiç qılı nəticə bə ni.Çimi əvəzədə çəy Elnur Quliyeviku 5 həzo dollar rışvə se oşko bə.
Ceyhun Əsqərov iddio kardə ki, Xaçmaz Rayon Polis Şebə rəis Həmid Həsənovi həmon fəxt Rusiyaku omə və de sələmi pul doə  Manaf nomədə əvlodən bəy ğarzoxoye. Həmonə xonəxokuən puli oqordone tələb kardə bə. De rəisi asparde bə çəy vəynə de Cinoyət Məcəllə 178.4 maddə cinoyət ko bino kardə bə və çəy barədə dastqirəti-ğətimko tədbir vıjniyə bə.