Bo Zəka Mirağayevi hukm handə be

İctimoi fəol çəy Viloyət Eyvazovi həxədə tənğıdi statuson ro de şər ğandə narkotik ittihomi cəzo se bəyon kardəşe.

Dastqirətiədə bə ictimoi fəol Zəka Mirağayevi 9 manq dəvom kardə məhkəmə bə orəx rəsə. De Boku Qonə Cinoyəton Məhkəmə hokmi əv, 3 sor ozodətiku məhrum kardə bə.
İstintoğ şə fəxtı Zəka Mirağayev de Cinoyət Məcəllə 234.4.3 (kulli miğdarədə narkotik bə dast varde, kırniye, oqəte – bo həvate məğsədi kardeədə) maddə ittihom bedə be. Prokuror dın maddə çəy 7 sor 6 manq ozodətiku məhrum kardə be piyəş be.
Əmmo Kamran Muxtarovi sərdorəti kardə hakimon kolleqiya çə maddaku “həvate” bekardəşe və ittihom bə Cinoyət Məcəllə 234.1-1 (bo həvate məğsəd nıbe kulli miğdarəda narkotik bə dast varde, oğəte) maddəş əvəz kardə. Çın maddə sanksiyadə cəzo 3 soriku tosə 8 sori nəzərədə qətə bedə.
Zəka Mirağayev ıştəni taxsikor zınedə ni, de narkotiki hiç qılı əloqə nıbe, sosial şəbəkonədə polison, əz cumlə Dılətonə Koon Vəzir Vilayət Eyvazovi həxədə tənğıdi statuson pevolo karde ro de narkotik şəri cəzo se votedə.
Əy məhkəmədə nav hokmi oxonə sıxanədə bəyonış kardə ki, de Narkotikon Mıbarizə Sər İdorə  rəis İslam Humbətovi asparde bəy işqəncə doə bə. Bə çəy cif narkotik Nəcəf nomədə polisi tərəfo noə bə. Zəka Mirağayevi de kardə təzyiğon sənədon imzo karde , Səbail Rayon Polis İdorə və çın rayoni 9-minə polis xonə videokamera nıvıştəyon məhkəmədə diyə kardə nıbe, məhkəmə sifarişi bə vırə rosniye votəşe.
Peş Zəka Mirağayevi oxonə sıxani hokm handə bə.
Çəy əvlodon, hokmi ğanuniku bə kəno və beədolətin be hisob kardən, apelyasiya şikot doe fikədən.