AXCP-e 3 fəol qətə bə

Azərboycon Xalğ Cəhbə Partiya 3 fəoli qətə be xəbə doə bedə.Çe əvon dı kəsi barədə inziboti ğaydədə dastqirəti cəzo vıjniyə bə, i fəolən polis xonədə oğətə bedə.

Məlumot partiya sərdori mıavin Ayaz Məhərrəmli  bə “Amerika Sədo”  bəyonış kardə.
De çəy sıxanon, partiya Xətai rayon təşkilati fəol Malik Babayev noyabri 27-də kəyku polison tərəfo bə Xətai Rayon Polis İdorə 36-mınə Polis xonə bardə bə. Xətai Rayon Məhkəmə Babayevış bə 15 sutka inziboti ğaydədə bə dastqirəti cəzo məhkum kardə.
 Noyabri 28-də AXCP Xətai rayon təşkiloti qılıən fəol, Natiq Abbasov bə Xəzər Rayon Polis İdorə dəvət kardə bə. Abbasov de polisi dəvəti şə və noyabri 29-də de Xəzər Rayon Məhkəmə əv de İnziboti Xəton Məcəllə 535.1-minə maddə (bə polisi ğanuni tələbi tabe nı be) ittihımış kardə, bə 25 sutka inziboti dastqirəti cəzo məhkumış kardə.
Noyabri 29-da məhkəmə bina vədə Natiq Abbasovi foto kəsə fəxt AXCP Xətai rayon təşkiloti qılıən fəol, Emin Abbasov qətə bə. Polison foto kəsə telefon çəykuşon sə və əvşon bə Xəzər Rayon Polis İdorə 1-minə Polis xonə bardə. Emin Abbasov holiədə polis xonədə oğətə bedə.
AXCP dastqirəti səbəb fəolon sosial şəbəkonədə bə statuson tənğıdi rayon nıvışte əloğənin kardən.
“Im, hakimiyyəti çandi-çand sorone bə AXCP vəynə bardə repressiya siyosəti dəvome”, – Ayaz Məhərrəmli bəyonış kardə.
De çəy sıxani, holiədə AXCP 11 fəol de cinoyət təğibi dastqirətiədəy.