Dastqirətiədə bə dindorə məhbusi bə təcovuzi məruz mande votə bedə

Dastqirətiədə bə dindorə məhbusonədə qılı, Bəxtiyar Babaşovi oğətə 17 numrəninə cəzokəşə muəssisədə bə təcovuzi məruz mande barədə çəy jimono həmro Arzu Abdulla məlumot doəşe. Əy bəyonış kardə ki, muəssisə rejimi rəis Samid Qafarovi bə Bəxtiyar Babaşovi vəynə təcovuzoş kardə.

Arzu Abdulla bın hodison etiroz, noyabri 30-də Binə ğəsəbədə bə cəzokəşə muəssisə vədə aksiya dəvonəşe. Əy,de jimoni həmro bə ico bə həmmə məhbuson vəynə təcovuzon oğəte tələb kardəşe.
“Vonən ım bə ki, Bəxtiyari tanədə kuləcə dıroz, kolo barze. Çəy kırtə kuləcə bo şıştem bardə be. Rejimi rəis Səmid Qafarov bəy hucumış kardə, bə divo ekkuəşe, mıştış jə. Bımi çiç bəvoten? Çımı kefi piədə tıni kue bəznem? Bəy ın ixtiyor ki doəşe? ”, – Arzu Abdulla bəyonış kardə.
De çəy sıxani, tosə işət çın xonəxo vey beğanunə əməlon şoyd bən, əmmo ictimoi kardəşon ni. Bə cəzokəşə muəssisə ovoştonə məhkumon sıftə i mıddət karantinədə oğətə bedən. Bın mıddətədə bo məhbuson vardə ərzağ iyən əlidə məhsulon vey fəxt muəssisə dukonədə həvatə bedən.
Arzu Abdulla bə Penitensiar Xıdməti şikot bıkoən, çəy votəyon inkor kardə bən. Penitensiar Xıdmətiku, Samid Qafarovi tərəfo bə Bəxtiyar Babaşovi vəynə təcovuz nıbe bəyonşon kardə.
Bəxtiyar Babaşov oxonə dı sorədə de narkotik ittihomi dastqir bə dindoronədə qılıye. Əv, 2023-minə sori martəda dastqir kardə bə və de Boku Qonə Cinoyəton Məhkəmə hokmi  4 sor ozodətiku məhrum kardə bə.
Bəxtiyar Babaşov ıştəni taxsikor zınedə ni.