Ombudsmanon de “AbzasMedia” dastqirətiədə bə jurnaliston vindemonşon kardə

Konfidensial ğaydadə dəvardə vindemon jurnaliston bə ictimoiyyəti ovarde bə peş səş qətə.

Ombudsman Aparati pevolo kardə məlumotədə, Ədliyyə Vəzorəti Penitensiar Xıdməti Boku İstintoğ Təcridxonədə be bəyon kardə bedə.
Məğsəd muəssisədə oğətə şərait iyən rəftor məsəlon, qətə xonəxon huğuğon təmin be tədğiğ karde bə.
“Ombudsman aparati Milli Preventiv Qrupi de ixtisası həkim və psixoloq uzvon iştirok kardə vindemonədə muəssisədə oğətə bə jurnalist Sevinc Abbasova, Elnarə Qasımova və Nərqiz Absalamova konfidensial ğaydadə qəbul kardə bən. Bə ovardəyon i kərən nəzə səğandə bə, kali qılon vırədə təmin bən”, – Ombudsman Aparati məlumotədə ğeyd kardə bə.
Oxonə rujon Azərboyconi Cəzokəşə Muəssison və dastqir vıronku de işqəncə holon band məlumoton doə bedən.
Oxonə səfə, noyabri 28-də 1 numrəninə Boku İstintoğ Təcridxonədə oğətə “AbzasMedia” 3 jurnalist –  Sevinc Vaqifqızı, Nərgiz Absalamova və Elnarə Qasımova bə ictimoiyyəti ivrədə ovardə bin.
Əvon Təcridxonədə dastqir bə xonəxon qonə şəraitiku nıvıştəşon be.
Azərboyconədə devlət rəhbərəti ətrofədə korrupsiya tədğiğaton bardə “AbzasMedia” 6 koəkə – sər direktor Ulvi Həsənli, mıavin Məhəmməd Kekalov, sər redaktor Sevinc Vaqifqızı, reportyoron Nərqiz Absalamova və Elnarə Qasımova,  jurnalist Hafiz Babalı dastqir kardə bən.
2023-minə sori noyabriku dastqirəti bino kardə bə bın jurnaliston vəynə ğaçağmoləti ittihom bə nav doə bə.