Dastqirətiədə bə dini fəol vəşyənəti aksiya dəvonidə

17 numrəninə cəzokəşə muəssisədə oğətə bə dini məhbus Natiğ Həşimovi noyabri 30-ku vəşyənəti aksiya dəvone barədə çəy əvlodon məlumot pevolo kardəşone.

De çəvon sıxanon, səhhətədə ciddi problemlon bə Natiğ Həşimovi mualicə se imkon nıdoe etiroz vəşyənəti kardə.
Bə vəşyənəti bino karde həxədə bə əvlodon əy ıştən de telefon zanqi vasitə xəbə doəşe.
 40 sininə Natiq Həşimovi qonə şəkə noxəşin be, şəkə bə 600 ros bedə, bə koma eqniye ehtimal bedə. Penitensiar Xıdməti Əməliyyat-Rejim İdorə rəisi Fikrət Qafarov mıddəti bə nav cəzokəşə muəssisə omeyədə çəy holış vində və bə Mualicə Muəssisə ovoştoneş aspardə:
“Mıddəti Mualicə Muəssisədə mualicəş sə. Noyabri 30-də maştəvonə saatonədə ənəxəbədə bə 17 numrəninə cəzokəşə muəssisə oqordonə bə.Çəy dəmononən hojo əyo mandən, mualicə bə orəx rəşə ni ”.
Natiq Həşimovi 30 sore şəkə diabetiku əziyyət kəşe və II qrup əlil be votə əvlodon, çəy, Mualicə Muəssisə Qulu və Vusalə nomədə həkimonku şikot karde votedən. 
 Natiq Həşimov 2023-minə sori mayə manqiku dastqirətiədəy. Əv Sumqait Şəhər Polis İdorə koəkon tərəfo qətə, idorədə bə işqəncon məruz mandə, çəyku narkotik maddə ittihomi bə qiy qəte tələb bə. Əmmo, sıftə əv rozi bə ni, peso de işqəncon iyən təhdidon bə çəy qiy noə bə və de Cinoyət Məcəllə 234.1.1 (bo həvate məğsədi nı be kulli miğdarədə narkotik bə dast varde, oğəte) maddə ittihom doə bə.
Dindorə fəol 3 sor ozodətiku məhrum kardə bə.