“İdorə rəison puli de siyahi bə mı dodəbin”

Navədə Naxçıvan Şəhər Polis İdorə rəis, 2020-minə sorikuən Muxtar Respublika Səfərbərəti və Hərbi Xıdməti Vanqi ro Devlət Xıdməti rəhbər vəzifədə ko kardə Mirzə Cəlilov ımsori fevralə manqiku dastqirətiədəy.

Devlət Əmniyyətə Xıdməti (DTX) Naxçıvan Muxtar Respublikədə dəvonə əməliyyaton nəticədə dastqir kardəyonədə qılıən Mirzə Cəlilov bə.
Əv, de təkror iyən kulli miğdarədə rışvə se maddon ittihom bedə.
Əv, Səfərbərəti iyən bə Hərbi Xıdmət Vanqi ro Devlət Xıdməti rəis ko kardə yığınəğədə muxtəlif odəmon hərbi xıdmətiku ya ikkərəti, yaan muəyyən mıddət oğəte ro rışvə seədə ittihom bedə.
Mirzə Cəlilov həmməyəvo 2 milyon nim mənot rışvə seədə ittihom kardə bedə.
In məbləğ təxminən 1150 kəsiku sə bə.
Polkovnik Mirzə Cəlilovi koy ro istintoğ bə orəx rəsə.
Bə çəy ko holiədə Naxçıvan Hərbi Məhkəmədə diyə kardə bedə.
Məhkəmədə ifodə doə Mirzə Cəlilov rışvə se ittihomış ğəbul kardə ni.
Əy bəyonış kardə ki, çiki bə hərbi xıdmət bəvəc ome və ya ne ome barədə rəy həkimon, tibbi komissiya dodə be.
Ğərəz mvocibi ziyodə pul se bə qiy bığətoən, ittihomədə nıvıştəyon sərost nıbe iddioş kardə.
“Har rubi oxoədə idorə rəison de siyohi  puli vardəbin, bə mı dodəbin. Çın məbləğe 10 faiz bə idorə rəison ıştəni oqordonə bedə be. Mandə hiss bə mı rəsdə nı be. Bə mı rubədə 10 həzo mənot paket doə bəbe”, – Mirzə Cəlilovi dekabri 23-də dəvardə məhkəmə prosesədə bəyonış kardə.
Məhkəmə proses dəvom kardə.