Maskabədimon bə Arçon dəşən

Ostoro Arçon di əji, vağonəda jiyə Aslan Qasımov de çol kande istə xezoni oğətedəbən.

Maskabədimon bə Arçon dəşənOstoro Arçon di əji, vağonəda jiyə Aslan Qasımov de çol kande istə xezoni oğətedəbən. De çəy moə, Rəvayət Qasımova sıxanon, 2023-minə sori iyuni 21-də çəy zoə çol kandə vırədə 15 kəs polison tərəfo dast-poçə epıştə, tuli dılədə bardə bə. Aslan Qasımovi barədə cinoyət ko oj kardə bə. Ostoro Rayon Polis İdorə koəkon çəy şəvlo rosə cifədə heroin be iddio bıkonən, əy məhkəmədə ın ittihomış rədd kardə. Rəvayət Qasımova dastqirəti səbəbi çəy imonin be votedə. Ğərəz Aslani Famil, Nail, İsa, Seyran nomədə əlidə imoninə cıvonə xonəxonən dastqir kardə bən. Dastqir bəyon dılədə iqlə imoninə cıvonon ne, Arçoni əlidə cıvononən hıstin. Aslan Qasımov 2024-minə sor yanvari 11-də de Lankon Qonə Cinoyəton Məhkəmə hakim Muşfiq Məmmədovi sərdorəti dəvardə məhkəmə prosesədə bə 5 sor mıddət ozodətiku məhrum kardə bə. Rəvayət Qasımova zoə dastqirəti bə peş maddi vəziyyəti bevəc be votedə. De çəy sıxani, əv zoə xeyzoni oğəte, bə dastqirxonə şe-omə xarcon de ıştə pensiya iyən so-bədə perosniyə havzəyon həvate hisob kardedə.