Azərboycon bo xarici bloqqeron 4 milyon vəsoit co kardəşe
Azərboycon Respublika Devlət Turizm Aqentəti beynəlxalq miğyasədə imidji ros karde və turizmi inkişofi ro bə nuə strateqiya das ğandəşe.
Dın məğsədi aqentəti 2025-minə sor fevrali 13-də devlət savdı vohid internet portalədə 4 tender elon kardəşe.
“Xarici jurnaliston, bloqqeron və turizm şirkəton ro oşnəti səfəron təşkil xıdməton hırye” tender tosə marti 7-i dəvom bəkarde.
Bo 4 tenderi ro co kardə vəsaiti həcm 4 milyon 190 həzo mənot təşkil kardə.
Tenderon 3 qitə əhotə kardən, 9 keşvəriku həmməyəvo 212 kəsi bə Azərboycon dəvət nəzərədə qətə bə. Çın xonəxon miyonəndə jurnaliston, turizm bloqqeron və səyohət aqentətiyon numayəndon bəben.
Bın baxşədə: Uzbəkistoniku 30 kəs, Qazaxıstoniku 30 kəs, Çiniku 30 kəs, Hindistoniku 40 kəs, Cənubi Koreyaku 10 kəs, İsrailiku 20 kəs, Rusiyaku 37 kəs, Belarusiku 15 kəs dəvət karde eçın qətə bə.
Dın ro hokumət iminə kərə rəsmi şəkilədə oşnə kardə siyosətədə influenser marketinqiku istifodə kardə.
Məğsədən, çəvonn azərboyconi həxədə pozitiv məlumoton pevolo karde, turizm potensialiı bə insonon rosniyeye.
Azərboycon hökumət navkoən bloqqer və səyohət influenseron reklam imkononku istifodəş kardə, əmmə əvon əsosən ğərb və rus bloqqeron fərdi və de çəvon təklifi bə jimon dəvonə bəbe.
Bın səfə de rəsmi tender ro bə həniən her-hevujə miğyasədə və məğsədinə şəkilədə bın prosesi start doə bə. Bəştə ğaziyon 80 mənot doe nıpiyə hokumət bo toyfə biznesi ro milyonon xarc kardedə.
