Bo İqbal Əbilovi 19 sor ozodətiku məhrum kardə cəzo piyə be

Mayə manqi 2-də Lankon Qonə Cinoyəton Məhkəmədə dəvardə məhkəmə prosesədə prokurori Azərboyconədə dastqirətiədə bə tolışə fəol, alim tədğiğatəkə İqbal Əbilovi 19 sor mıddət ozodətiku məhrum kardə cəzo piyəşe.

Bə tolışə cıvionə alimi ko Lankon Qonə Cinoyəton Məhkəmədə diyə kardə bıboən, əv ıştən Bokuədə oğətə be ro hakimon bə prosesi onlayn umjən qıniyən.
Belarusədə jiyə İqbal Əbilov 2024-minə sor iyuli 22-də bə Azərboycon əvlodon vəyə omə yığınəğədə qətə bə.
Azərboyconədə jiyə mərdumon, əz cumlə de tolışon band elmi tədğiği koon məşğul bə etnoqraf İqbal Əbilovi barədə 2024-minə sor iyuli 24-də Səbail Rayon Məhkəmədə bo sıftənə istintoğ mıddəti ro 4 manq dastqirəti ğətmko tədbir vıjniyə bəbe. Peşo ın dastqirəti mıddət dıroz kardə bə.
Cıvonə tolışə alim İqbal Əbilov de Cinoyət Məcəllə 274 (bə devləti xəyonət), 281.3 (bə devləti əleyh vanq – de xarici təşkiloton və de çəvon nımayondətiyon asparde kardeədə) və 283.1- (milli, irqi, sosial və ya dini nifrət və deşmenəti eğande) maddon ittihom kardə bedə.
İqbal Əbilov de Erməniston xususi xıdmət orqanon ko kardeədə, rozi bə şəkildə Azərboyconədə milli zəminədə nifrət eğande cəhdədə ittihom bedə.
İqbal Əbilov ın ittihomon həmmə absurd be iddio kardə, ıştəni taxsiko zınedə ni.
İqbal Əbilov Latviyada çe ğeydiyyato dəvardə Tolış Milli Akademiya təsisəkəyonədəy.