Berlinədə Azərboycon səforəti vədə aksiya

İctimoi fəol Natiq Məmmədov Berlinədə Azərboycon səforəti vədə ikəsinə aksiya dəvonəşe.

Əy, bə siyosətmədor Tofiq Yaqublu vəşyənəti aksiya dastək və beəsos dastqirəti etiroz ıştənış bə səforəti osonə parçini dəbastə.
Tofiq Yaqublu 2023-minə sor dekabrədə dastqir bə. Marti 10-də Boku Qonə Cinoyəton Məhkəmədə dəvardə prosesədə dələdızdəti və saxta sənəd hozzo kardeədə taxsiko zınə bə, 9 sor ozodətiku məhrum kardə bə. Bımi etiroz əy, apreli 1-ku bə vəşyənəti aksiya bino kardəşe.
Tofiq Yaqublu apelyasiya məhkəmə bə may 6 təyin kardə bə.
Mıxalif siyosətmədor 32 sore bə Azərboyconi rəhbərəti kardə Əliyev toyfə əsos tənğıdəkəyonədə qılıye və bın mıddətədə 8 kərə dastqir bə. Əv, bənə vicdon məhbusi zınə bə.
De Tofiq Yaqublu dastqirəti anqıl beynəlxalq reaksiyon ziyod bedən.
AİŞ Konqresi uzv Eleanor Holmes Norton Prezident İlham Əliyevış Tofiq Yaqublu ozod karde vanğ kardə.
Norveç Helsinki Komitə istə pevolo kardə bəyonatədə Tofiq Yaqublu ozod be vanğ kardəşe.
Almaniya AŞPA-də təmsil bə deputat Frank Şvabeən de Tofiq Yaqublu band norohətəti ifodə kardəşe.