Avropa Parlament Avropa İttifoğe bə Azərboyconi vəynə sanksiya noe təklif kardə

Avropa Parlamenti se uzv Azərboyconədə bə jurnaliston, tədğiğotəkon və fəolon vəynə oxonə rujonədə dastqirəti cəzon məhkum kardə bəyonat pevolo kardəşone

Avropa Parlament Avropa İttifoğe bə Azərboyconi vəynə sanksiya noe təklif kardəAvropa Parlamenti se uzv Azərboyconədə bə jurnaliston, tədğiğotəkon və fəolon vəynə oxonə rujonədə dastqirəti cəzon məhkum kardə bəyonat pevolo kardəşone.İnson Huğuğon ro Jinə Komitə sərdor Mounir Satouri, de Cənubi Qafqazi band nımoyəndə heyəti sərdor Nils Ušakovs və Azərbaycani Avropa Parlamentədə daimi məruzəəkə Dan Barna ıştə bəyonatonədə ın dastqirətiyon “bə rejim tənğıdəkon vəynə beəmonə təzyiğon mərhələ” be iddio kardəşone.Bəyonatədə ğeyd bedə ki, 2025-minə sor iyuni 23-də, Çexiya Karlov Universiteti doktorant, tədğiğatəkə və sulh fəol Bəhruz Səmədov 15 sor ozodətiku məhrum kardə bə. Əv, ponə sori avqustə manqədə dastqir kardə bə və bə vətəni xəyonət əsos nıbə ittihomon mıhakimə bə. Səmədov bın rujonədə vəşyənəti aksiya dəvone və intihori cəhd karde bəyonatədə votə bedə.İyuni 20-dən bə mıstəğıl “AbzasMedia” koəkon 7,5 soriku tosə 9 sori dastqirəti cəzo doə bə. Əvon de “xarici valyuta ğaçağmoləti” və “pul şışte” pesoxtəyon ittihom bən. Avropa Parlamenti uzvon həmən etnik tədğiğatəkə İqbal Əbilovi 18 sor, mıxalifəti fəol Tofiq Yaqublu 9 sor dastqirəti cəzo doə beyən ğeyd kardəşone. Bəyonatədə votə bedə ki, bın cəzon məruz mandə xonəxon hisob Azərboyconədə bə 400 nez bə, ımən hələ həmmə ni.Avropa Parlamenti uzvon Avropa İttifoğe Azərboyconədə inson huğuğon darışte ro məsuliyyətin bə rəsmi xonəxon vəynə sanksiyon tətbiğ karde vanğ kardəşone.Avropa Parlamenti uzvon bın bəyonati rəsmi Boku hələlik mınasibət bəyon kardəş ni.Huğuğ mıdafiəkon hozzo kardə siyohiədə, Azərboyconədə 375 siyosi məhbus be ğeyd kardə bə.Azərboyconi rəsmiyon de ın fikon rozi bedə nin, çikiisə de siyosi motivon dastqir be ğəbul kardə nin.