Rufət Səfərovi dastqirəti ğətmko tədbiri mıddət ziyod kardə bə

Apreli 29-də bə huğuğ mıdafiəkə Rufət Səfərovi barədə vıjniyə dastqirəti ğətmko tədbiri mıddəti dıroz karde band istintoğ orqaniku edaştə təğdimoti diyə kardə bə.

De Binəqədi Rayon Məhkəmə ğərori, Rufət Səfərovi dastqirəti mıddət həniən 1 manq dıroz kardə bə.
Bo huğuğ mıdafiəkə dastqirəti ğətmko tədbiri dıroz karde ro əsos arqument əv bə ki, istintoğ bə orəx rəşə ni. Çın səbəbiku çəy dastqirətiədə oğəte mıddəti dıroz karde zəruriye. Mıdafiə tərəf etiroz bikoən, hakimi təğdimotış təmin kardə.
Rufət Səfərovi barədə dastqirəti ğətmko tədbiri mıddət tosə may 23 dıroz kardə bə.
Rufət Səfərov 2024-minə sor dekabri 3-də dastqir kardə bə.
Əv de Cinoyət Məcəllə 127.2.3 (ğəsdo qonə xəsorət je), 178.3.2 (kulli miğdorədə ziyon je dələdızdəti) və 221.1 (xuliqanəti) maddon ittihom bedə.
Cinoyət koədə iddio bedə ki, Rufət Səfərov Novxaniəda de zəmin həvate nomi Natiq İmamquliyev nomədə xonəxoku 60 həzo mənot pul səşe.
De həmonə xonəxo miyonədəşon hese-bes eqıniyə, əvış kuə.
Rufət Səfərov ın ittihomon pesoxtə be iddio kardə.
Rufət Səfərov dastqirətiədə bə yığınəğədə, 10 dekabrədə – de Beynəlxalq İnson Həxon ruji mınasibəti həmonə fəxt AİŞ devlət katib Entoni Blinkeni tərəfo bə “Sori zumandə huğuğ mıdafiəkə” mukafati təltif kardə bə.
Rufət Səfərov navko Di Təsərrufati Vəzorətədə sər huğuğşunas, peşo prokuraturadə mıstəntığ bə.
Əy, 2015-minə sori dekabrədə azərboyconədə inson huğuğon darışte, ğanunon ko nıkarde etiroz prokuratura mıstəntığ vəzifəku istefo doəşe.
Rufət Səfərov bəvədə 9 sor ozodətiku məhrum kardə bəbe.
2019-minə sori martədə de əfv sərəncomi fəxtiku bə nav bə ozodəti vadoe bədiqə de “Mıdafiə Xətti” təşkilotış təsis karde de inson huğuğon mıdafiə məşğul bə.