Mısılmon İbemon Hərəkati qılıən uzv dastqir be

Mısılmon İbemon Hərəkati (MİH) uzv Elqiz Məmmədovi dastqir be  barədə məlumot onemoni tərəfo pevolo kardə bə.

MİH doə məlumotədə, dindorə fəoli barədə iyuni 12-də Nizami Rayon Məhkəmədə 4 manq dastqirəti tədbir vıjniyə be votə bedə. Əv, de Cinoyət Məcəllə  234.1-1- (de həvate məğsədi nıbə beğanun narkotik vasiton və ya psixotrop maddon şəxsi istehlak mığdarisə ziyod bə dast varde, oğəte, hozzo karde, kırniye) maddə ittihom bedə.
MİH uzv Elqiz Məmmədov İyuni 10-də Boku Keşlə ğəsəbədə qətə bə.
Məlumotədə bə çəy əvlodon istinod votə bedə ki, bə Elqiz Məmmədovi narkotik maddə ittihomi ğəbul karde ro polis idarədə bəy işqəncə doə və bə çəy peşomə ovi narkotik maddə umjən kardə bə.
MİH Elqiz Məmmədovi narkotik maddə istifadəkə nıbe və şər ğandə be bəyon kardəşe.  
Elqiz Məmmədov 2022-minə sor may 20-də MİH uzv Razi Humbətovi məhkəmə proses bardə Boku Qonə Cinoyəton Məhkəmə vədə qətə və 30 sutkə inziboti dastqirəti cəzo səş be.
Bəvədən çəy bə ciddi işqəncon məruz mande, de şantaj karde bə video kəşe çəyku ikərən bə məhkəmə və nıome bəyon karde tələb bəbe.
MİH rəhbər xonəxon holiədə dastqirətiədən. Əvon 2015-minə sor noyabri 26-də Nardaran hadison anqıl dastqir bən.
Azərboyconədə bə Siyosi Məhbuson iyuni 9 siyohi əsos 375 kəs de siyosi motivon dastqir bə xonəxo hıste və çımonən 241 kəs dindorin.