Azərboyconədə Aşura ruji ğədəğənon

İyuli 6-də Azərboyconədə Aşura ruj ğeyd kardə dindoron məcitonədə bə dini mərosimon faktiki məhdudiyyət noe şoyd bən.

Sosial mediadə pevolo kardə məlumotonədə, bə vətəndoron mərsiyə hande, sinə je və hətto bəme icozə doə nıbe votə bedə.
Zənən ibodətəkon miyonədə de ım məhdudiyyəton dim-bədim bə jurnalist Arzu Abdulla Qulzaman Boku Əjdərbəq məcitədə vindəyonış bə ictimoyiəti rosniyə.
De çəy nıvışte, məcitədə jenə məlo və axund bo mərsiyə vote icozə doəşon ni, polisi “hokumət bəme icozə dodəni” cəvob doəşe.
Azərboycon hakimiyyəti nəzarətədə bə Qafqaz Mısılmononon İdorə (QMİ) ım sor Aşura ruji iyuli 5-də ğeyd karde elon bıkoən, şiə icmo ro iyuli 6 Aşurə bə.. 
In vəziyyət Azərboyconədə devləti de rəsmi dini onemonon vasitə dini jimoni bə nəzarət se,  şiə icmo səpe bənə dominantəti mesaj dərəsə bedə.
Əğlonən bə məcit vadoə nıbe de Aşura band ən vey məşvərət kardə məsəlonədə bə. De doə xəbon, təhsil muəssisonədə bə valideynon əğlon bə dini tədbiron nıbarde barədə xəbərdorəti kardə bə.
Huğuğşunas Xalid Bağırov bə “JAMnews”i doə intervyuədə ğeyd kardəşe ki, bə dini mərosimon joğo mudaxilə Azərboycon Konstitusiyadə təsbit bə vicdon və dini ozodəti huğuği darışteye.
Mısılmon İbe Hərəkati Avropa ru nımoyəndə Ələmdar Bunyadov hisob kardə ki, ım  devləti bə şiə icmo vəynə deşmənəti nuşu dodə.