Fransa terroriston bə İrağ dəvonə bıən

De İŞİDi təmasədə be ro qınoko zınə bə 47 Fransa vətəndor çe Suriya Rojava əyolətiku  bə İraq dəvone barədə İraq Milli Kəşfiyot Xıdməti məlumot doəşe. 

Associated Press aqentəti iminə kərə bın barədə bə İraq əmniyyətə xıdməti istinod sentyabrə manqi 18-də xəbə doəş be. Xəbədə Rojava rəsmiyon tərəfo bə İraq 47 Fransa vətəndor bo məhkəmə ro doə be ğeyd kardə bəbe.
Fransa hakimiyyəti tərəfo bın ko hiç qılı şərh doə bə ni. Terrorə əməlonədə şəkkin zınə həzosə ziyod İŞİDi uzvon Rojava zindononədə, çəvon xeyzonon duşərqionədə oğətə bedən.
Dəvardə həftə Fransa de İŞİDi təmasədə şəkkin zınə 3 zənən xeyləğe və 10 hırdən Rojava duşərqəku repatriasiya karde be barədə XKV xəbə doəşe. 
De AFP aqentəti bə diplomatik mənbə istinod doə xəbə, cəmən 2019 minə soriku Fransa Rojava duşərqəku 179 hırdən və 60 zənən xeyləğeş repatriasiya kardəşe.
Rojavədə bə kırd hakimiyyət  çandi-çand kərə beynəlxalq ictimoiyyəti ıştə vətəndoron repatriasiya karde ro ovardəyon, ın idealoqiyon ıştə keşfərədə pevolo nıbe ro be nəticə mandən. İyo ğərb burjua bə Nezə Şərğədə terrorəti anqıl be vində bedə. Bə ımi səbəbən çəvon ıştə kiyəti qin karde və dəmərəsətiye. Teylə vıronən ekstremiston tərəfo de rohətəti pur kardə bedə Ğərbi xususi xıdmət orqanon hələ dəvardə əsri 80 minə soron Əfğanistonədə de joğo təbılğati məşğul be və  bo mərəşulə eğande ro bə əlidə keşfəron dəvone bəlli be.