Çılə şəvi ayinon

Yəlda çı İronıjon ğədimiyə ritualonku qıləyniye ki,ha sor 21 dekabr(Azərə manqi 30) id qətey bedə.

Çandə həzo sor çımi bənav de tobə ısət de pozi bə oxo rəsey iyən zımıstoni bino bıey,de pozi oxonə şəvi iyən zımıstoni iminə ruji dəmey ki,həlbəttə sori həmməysə dırozə şəve,İronıjə xıyzonon iyande qırdo cəm bedən və şəvi de tosə sıbi vaxti iyande kəno dəvordıneydən.

Yəlda Suryani zıvonədə ki, (Arami zıvonon ləhcəonku qıləyni) təvəllud iyən zandey mənoədəy.bə ğədimiyə ironıjon bovə əsos,həşi bın şəvədə ijən sənibəton moəku bedə.çıro ki,çı Yəlda şəvi maşkinə rujiku de həşi pemey,rujon həni dıroz bedə və həşi nuri dətıvey ziyod bedə.çımisə əlovə,çı astronomon nəzəku pozi oxoyədə həşi şimoli nimə kurədə ıştə hasornə hərəkətədə bə cənub şərği ufuği həmməysə saruyə noxtə omeydə rəseydə ki,ın həm  bə ruji dırozi kırtəti iyən şəvi toykiyəti dırozəti boyis bedə.əmmo,çı zımostoni ya zımostoni inğilobi sıftəku həşi ijən bə şimol şərği səmt hərəkət kardedə ki,nəticədə çı ruji ruşinəti ziyod və şəvi dırozəti kuto bedə. liza, çun ğədimiyə İronıjon ovşımşınosi ya astronomiya elmədə alim iyən mahir bin və dəğiğ formadə sori manq iyən rujon aşmardedəbin,əve əvon pozi oxonə ruji həşi ijən sənibəton bə dınyo omey cəşn iyən id qəteydəbin.

Dəvardə əsronədə bıə milləti əsos iyən əslə məşğuliyyət,məzə iyən kaştemoni sahə təşkilış doə və qırd sori dırozi deştə fəslon iyən təbiiyi təzaddon dəvordıney,bə təcrubə iyən zəmoni dəvardey,ta ıştə ko iyən fəaliyyətonışon de həşi qarde və de fəslon əvəz beıy,həmçinin ruj,şəv,cəhət iyən hərəkəti tənzimkon.de ın hərəkəti əvon mılohizə kardedəbin ki,sori kali fəsl iyən rujonədə ruj vey dıroz bedə və nəticədə bə rujonədə həşi ruşinəti ziyod bedə ki,əvon həm çı həşi nuriku çok-çoki oko doydəbin.ın etığod iyən bovə bə əməl ome ki,həşi nur iyən dətıve çı çokəti rəmz iyən simvole.bə həmonə dəlili xoto,pozi oxonə ruji oxonə şəvi,deştə kaştemoni sahədə perosnə bənə əno,zımostoni iyən hışk kardə bıə miyvəonku ki,de zəhməti de tosə ın şəvi solim mandə və çəvon har qıləyni ki,qıləy məxsusə rəmz iyən simvolin,id və cəşn dəvordıneydən və Yəlda şəvi bərpo kardedən və de tosə sıbhi vaxti oğo mandedən.