Masalu şəhərədə çe Şeyx Sərdar Hacıhəsənli məhkəmə.

Mayi 25-minə ruji Masalu şəhərədə çe Şeyx Sərdar Hacıhəsənli məhkəmə dəvom kardəşe. Bə məhkəmədə içtirak karde ro xeyli imon əhli, həmən xarici diplomatik numayəndon oməbin. Bı səbəb rayoni polison bənə 1-minə məhkəmə iclasə ruji de odəmon hoziə hərəkəton nıkardışone. Məhkəmə otağ qədəli bıe səbəbiku əyo cəmi 30 nəfəri iştirak mumkun bıe. Diplomatə numayəndonən iştirakəkon arədə bin.

İm məhkəmən bənə Nardarani məhbuson muhakimə de  eyni senari dəvarde. Hakimi vəkilon vəsadəton həmə rədd kardışe. Hətto ey Masalu rayoni icra hakimiyyəti sərdar ki, də çey şikayəti Şeyx Sərdarşon dəstqir kardə, bə məhkəmə ome və rəsmi ifadə doe barədə vəkilon vəsadətən təmin nıkardışe. Imən Devləti ğanuni hakimi tərəfo darışteye. Vəkilon ım fakt bə çey nəzə rosnişone.  Məhkəmə nubətinə iclas iyuni 7 -ədə peşçoştə saat 2-ədə dəvardənine.

Mayə manqi 23-minə ruji Sabunçi rayoni məhkəmən Nardarani məhbusonədə qıley - Fail Şahbazovış bə 1 sor 9 manq muddətinə zindonə cəzo məhkum karde. 2016-minə sori noyabri 23-ədə polisi əvış de bıhtonə maddə dəstqir kardəbe. Fail Şahbazov votedə ki, çey bə zindon dənoe əsil səbəb bımədey ki, ey ponə sori Nardarani şəhidon ğəbon polison tərəfo xərobə karde barədə informasiya və foto şəkilon sosial şəbəkonədə pevolo kardəşe. Faili pıə və 2 qılə bıyən de Nardarani hadisə əlağədar bə zindon dənoəşone. Əv i qılə ailə 4-minə uzve ki, Əliyevi hokuməti tərəfo məhkum bedə.