Boku hokumət bə tolışə milliə fəalon təzyiğ və şantaji dəvom kardedə

İyunə manqi 8-ədə Boku polisi de banditizmi mubarizə şebə "Tolışi sədo" rujnomə redaktor Hilal Məmmədov bə istintağ cəlbış karde, 5 saatinə təhğiği bəpeşt sərbəst vadoşe. Həmonə ruji polison Masalu şəhristani Bədəlon diy sakin, Tolışə Mədəniyyətə Mərkəzi fəal Fərid Abbasov dəstqir kardışone, bo istintağ karde ro bardışone bə Boku.

Respublika Sər Prokuratura bə Qonə Cinayəton dair İstintağ idarədə dey təhğiğatşon barde, bey xeyli tars omə, şantaj kardə bəpeşt əvşonən sərbəst vadoe. Im dəstqiri bə peştə ey ıştə dustonku xahiş kardəşe ki, sosial şəbəkədə bə çey dəstqir karde dair statuson bımolon. Bə rujədə diğər tolışə fəal Azər Kazımovən bə polis şebə bardışone, deyən bəzi molağati bə çəton əvşonən vadoe. Çimi təğribən həfteyi bə nav Respublika Tolışə Mədəniyyətə Mərkəzi sədr, "Tolışon sədo" rujnomə redaktor Rafiğ Cəlilovşonən bə istintağ cəlb kardəbe. Çey çe Respublikaku bə xaric şe səpe ğədəğə noəşone.

Imiən ğeyd karde lozime ki, 2012-minə sori "Tolışi sədo" rujnomə redaktor Hilal Məmmədov bə 5 sor muddəti zindonə cəzo məhkum bıə bəpeşt Rafiğ Cəlilovi çey ko dəvom kardışe. De ıştə maddi vəsaiti həmonə rujnomə de "Tolışon sədo" nomi bino noşe. İm rujnomə nəşri ısətən dəvom hestışe. De tolışə milli fəalon maddi və mənəvi dastəqi har manqədə 1 numrə bə əhandon edaştə bedə.

Boku hokumət hələ 2007 -minə sori "Tolışi sədo" rujnomə redaktor Novruzəli Məmmədov bə zindon dənoşe, əv de çey 2 qılə fərzəndi ğətl kardışe. Isətən əv de har vasitə ım rujnomə vəy se ro çey fəalon bə  jıqo təhdid və şantajon məruz nodə. Əmo tosə ısət bəştə məğsəd rəse zınə ni, jıqoşən çətin ki, bırəso.