"Tolışon sədo" rujnomə 5-minə numrə çe çapo beşə
De Rafiğ Cəlilovi sər redartorəti, həmən de çey təşəbbus və zəhməti çəmə tolışə zıvoni yekanə rujnomə "Tolışon sədo" 5-minə numrə bə əhandon edaştə bıə.
Rujnomə sıftənə səhifə de İronə İslamə Respublikadə terrorə akton əlağədar Respublika Tolışə Mədəniyyətə Mərkəzi həmdardiə bəyonati bino bedə. Bətonətədə tolışon ım ictimai təşkilat jıqo ğeyri-insonə hərəkəti məhkum kardedə, bə şəhidon nezə odəmon səbr, bə zəxmin bıə şəxson şifo orzu kardedə. Bı səhifədə bə tolışə fəalon hokuməti tərəfo təhdidon zumand bıe dair əhand Fuadi məğalən dərc bə.
Rafiğ ıştə "Şinə dıvu, yainki telə həğiğət" məğalədə Boku hokuməti respublkadə milli kamiyon vəziyyəti həxədə bə Avropa Şura çı cur soxtə məlumaton doe cəhdi ifşa kardedə. Məvotbən 2017-minə sori yanvarə manqi 11-ədə hokuməti bə AŞ "Milli kamiyon muhafizə həxədə Çərçivə Konvensiya" dair ıştə 4-minə məruzə təğdim kardəşe. Əhandon çe Rafiğ boyli məğalədə ım məruzə çanədə dıvuə və soxtə məlumatono ibarət be həxədə ətrofinə fakton hande bəzınen.
Rujnomə Az.R -ədə bə tolışon nubətinə təzyiğon çe Tolışə Sipirişon Şura etirazə bəyanati tam mətni bə əhandon nəzə rosnidə.
Çe Sumğayit şəhəriku Famil Şivəxani ıştə "Əvərs" nominə məğalədə Tolışıstoni ekoloqiya problemi bə miyon vardedə. Məlume ki, Əvərs tolışə flora nadirə həmişəhavzinə doonədə qıleye. Əmo ısət hokuməti bardə beməsuliyyətinə siyasəti nəticədə Liki şəhristani əvərsə vişon ancedən. Əqər əlağədar təşkilaton çimi vəy nısənon, Tolışə vişonədə ım nadirə beməyi tum təmom bıriə bəbe.
Əhandon rujnomə səhifonədə həniən co marağinə ədəbi məğalə, hekayə və şeeron hande bəznen.
