Şeyx Sərdar Hacıhəsənli məhkəmə bə orəx rəsedə

İyunə manqi 19-ədə Masalu şəhəri məhkəmədə Azərbaycani Ruhanion Məclisi uzv, dini məhbus Şeyx Sərdar Hacıhəsənli məhkəmə iclas dəvardə. Çe məmləkəti muxtəlif məntəğonku xeyli şəxson bı iclasədə iştirak karde ro bə məhkəmə bina və oməbin.

Əmo polison ğeyr-əz vəkilon və kam miğdarədə odəmon, bə əmandəyon məhkəmə iclasədə iştirak karde imkan nıdoşe. Hərçənd navonə məhkəmədə xarici diplomaton iştiraki vaxti, ım polison ıştəni vey nəzakətin və demokratik bardedəbin, jıqo qıley məhdudiyyət tətbiğ kardedənıbin.  "Maide.az" sayt xəbə dodə ki, məhkəmədə orəxnə şohidon ifadə doəşone. Prokurori tərəfi ıştə ittihami elan karde ro de tosə iyuli 3-minə ruji məhkəməku mehlət piəşe. Hakimi bə həmonə vaxt nubətinə məhkəmə iclas təyin kardəşe.

Şirvan Apelyasiya Məhkəmən çe Şeyx Sərdari deştə nezə odəmon vindemon və dəvon de telefoni qəp je ğədəğən karde barədə çe Masalu rayoni məhkəmə ğərar ləğv kardəşe. Im xəbə bə "Maide.az"i vəkil Cavad Cavadovi votəşe.

Bə Dini Təşkilaton dair Devlətə Komtə bə ilahiyyatçi İlğar İbrahimoğli çəşnavi doəşe ki, bey aidiyyəti nıbə dini icmadə məclis dənıvuno. Əks təğdirədə çey barədə lazımi huğuği tədbir bəvinden.

Turkmənistani prezident Ğurbanğulu Berdıməhəmmədov de Rujə idi munasibəti 1029 nəfər məhbus əfv kardəşe. Çe Azərbaycani Prezidenti tono Əfv Kommissiyadə bə "Modern.az" sayti votəşone ki, çəmə Respublikadə jıqo qıley əfv sərəncom çəş kardə bedəni.