Şeyx Sərdar Hacıhəsənli bə 3 sornə zindonə cəzo məhkum kardışone
İyulə manqi 3-minə ruji Masalu rayoni məhkəmədə Azərbaycani Ruhanion Məclisi uzv, "Maide.az" sayti redaktor Şeyx Sərdar Hacıhəsənli muhakimə bə orəx rəsə. Məhkəmə əvış bə 3 sor muddətinə zindonə cəzo məhkum kardə.
"Maidə.az" sayti məhkəmə barədə reportaj dərc kardəşe. Seyx Sərdari bə iclasədə votəşe, "az vey xoşhalim ki, mınyon bə çımı əğidə, bə çımı imoni qorə, Xıdo bə mı əmr kardə əməli icra karde səbəbiku bə zindon dənoəyone. Mıni ittiham kardedəyon ki, quya cinayət kardəme. Az ibadət kardəme, cumə nomoj votəme. Şımə im ibadəti cinayət hisob kardedəyon. Iştə ım curətiku dast kəşe barədə fikir bıkənən." Ey həmən bə ıştə vəkilon və məhkəmədə iştirak kardə imoninə həmməsləkon təşəkkur votəşe.
Azərbaycani İslamə Partiya çe Masalu məhkəmə ım hokum beədalətin hisob kardəşe. Bə islam dini, bə Azərbaycani xalqi munasibətədə bey bənə ğərəzkar qıley əməli ğıymət doəşe.
Şeyx Sərdar Hacıhəsənli bə Masalu rayoni İcra Hakimiyyəti sərdari şikayəti əsasən de "ğeyri-ğanuni Cumə nomoj vote" ittihami dəstqir kardəşonbe.
Bə "Haci Cavad" məçiti oşınie etiraz kardə dini fəalonədə Tural Babayev və Ravin Aslanov polisi tərəfo iyuni 30-ədə dəstqir kardəşone. İyuli 2-ədə çəvon valideynon bə "Meydon TV" xəbə doəşone ki, tosə ısət ım fəalon tale həxədə polison bəvon hiç qıley məlumat doəşon ni. Əvon ıştə ım əğılon aqibətiku vey norohətin.
