Tolışə tarixiə artefakton dızdie dəvom kardedə

Azərbaycani Milliə Elmon Akademiya Arxeoloqiya və Etnoqrafiya İnstituti həmkaron xeyli vaxtbe ki, Liki rayoni Qırdəsər diy "Pibozə peştəy" nominə vırədə arxeoloji kandeko bardedəbin. Əyo çe miladiku V əsr bə navonə vaxton aid sərdabə, 120 qılə ğəb, xeyli midarədə şimşi, ğəmə, çaxu, kort, nığə və bırıncə ziynət əşyaon, kaşiə ğabon bə oşko bekardəşonbe.

"Aztoday.az" bə "Təzadlar" rujnomə istinadən xəbə dodə ki, Liki rayoni İcra Hakimiyyəti numayəndə bə çey muxbiri məlumat doəşe ki, həmonə artefakton naməlum odəmon tərəfo dızdiəşone. Rayoni polis şebə həmkaron de ım fakti əlağədar nezə dion sakinon kəonədə axtarış bardedən.

Bə rujnamə muxbiri həmən votəşone ki, koğəzi səpe ekspedisiya uzvon miğdar tosə 30 nəfəri bənine. Bə har kəsi manqi 500 mənot ezamiyyə xarci dodən. Haliyyədə de kandekon məşğul bəkəson miğdar 10 nəfərisən ziyod ni. Bə ım koon 1 nəfər elmon namizəd rəhbərəti kardedə ki, əvən çe Arxeoloqiya İnstituti direktor Maisə Rəhimova nezə əvlode. Rəhimova bə APA sayti ım dızdiə fakt təsdiğ kardəşe. Əmo bə "Təzadlar"i mubiri parson cəvob doəş ni.

Az.R-ədə bə Tolışə xalqi tarixi dair ğıymətinə  maddi moliyyəton dızdie fakton xeyli vaxte ki, dəvomış heste. 8 sor çimi bə nav Masəlu rayoni Tojə Alvədi  nezi qıley kurqani bə bırınçə devri aid artefaktonən dızdiəşonbe. Çey bə nav Cili "Seyid Xəlifə" ocəğədə "Əli lınqə riz", çand qılə tarixi şəxsiyyəton ğəbi sığon, Lankoni Şıxəkon diədə Şeyx Zahid Qilani səy sığ dızdişone. Hiçən təəccubinə ko ni ki, tosə ısət Əliyevon hokuməti huğuğ - muhafizə orğanon həmonə dızdonədə hiç kəs peydo kardəşon ni.