Ehtiyaci səbəbiku 1qılə ailə 4 nəfər hırdən bə məktəb şe zındənin

Hostoro rayoni Ojəkon diy sakin Rasif Əliyevi 5 qılə hırdən hestışe, çəvonədə 4 nəfər bə məktəb şəninin. Əmo çəvon valideynon xeyli vaxte ki, bekorə be səbəbiku ım sor bo əvon məktəbə olət və dərsə ləvazimaton hırie imkan nişone. Bı səbəb ıştə ım fərzəndon bə məktəb vığande zınedənin.

Rasifi bə "Azadlıq.info" sayti votəşe ki, navko kom hestbe, ıştə ailə quzərani təmin kardedəbim. Isət həm az, həmən çımı jimoni həmro xeyli muddəte ki, bekomon. Oməmon dəvitəmon bəştə həsuə kə. Çand vaxte ki, ko axtar kardedəm, bə rayoni əlağədar təşkilaton çanədə muraciət kardəme, hiç xeyrış bə ni. Bı nezonədə ıştə jimoni həmromən peqəte şimon bə Sabirabad bo pambə qırd karde. 15 ruj ko kardımone, çəmə pulon nıdoşone, teylədast oqardimon bə dumo.

Rasifi jimoni həmro Zulfiyyə qəp jəşe ki, "həmişə votedən ki, tojə koə vırə oj kardəşone, əmo bo əmə hiç vırədə ko peydo bedəni. Məktəbə hırdəni oləti pul 200 mənote. Hokumət bə beçizə odəmon hiç qıley komək kardedəni".

Ailə yolə fərzənd Aynuri 4-minə sinif de "əla" ğıyməton oroxniəşe. Eyən bə muxbiri votəşe ki, bə məktəb şe pidəşe, əmo dərsə ləvazimat nişe.

Rasifi bo sosial muavinəti ro bə Hostoro rayoni Sosial Mudafiə şebə muraciət kardəşe. Bey hətto kartən doəşone, əmo peşo bey muavinət doeku imtina kardəşone. Rayoni Təhsil Şebədən bə sayti muxbiri votəşone ki, çəvonku bo beçizə ailon hiç qıley qozəşt və koməkəti nəzərədə qətə bıə ni.