Tolışə zona kali dionədə hırdənon bə məktəb şeədə mışğılon heste

Tojə tədrisə sor bino bıə, əmo Tolışə zona bəzi dionədə şaqirdon bə dərs şeədə problenon hestin ki, rayoni məmuron əvoni həll karde holədə nin.

Im sornəku Masəlu rayoni Məmmədoba di məktəb ləğv be səbəbiku, çəvrey 50 nəfər şaqird Tuklə diy məktəbədə təhsil se məcburiyyətədə mandən. İm dion arə məsafə 5 kilometre. Diy sakinon Xəyalə Muradova və Namiq Salmanovi bə "Azadlıq.orq" sayti muxbiri votəşone ki, ibtidai sinifi şaqirdon şe - omə 10 km roy ğət karde holədə nibəben. 1992-minə sori Məmmədoba diədə notəmomə miyonə məktəbi bina inşa kardəşone. Ey təmir karde əvəzi, ləğv karde məna əve ki, ım diy hırdənon, məxsusən, ibtidai sinifi şaqirdon təhsil se imkaniku məhrum bəben.

Masəlu Rayoni Təhsilə Şebədə votəşone ki, bə Təhsilə Vəzarəti proqrami muvafiq Masəlu rayoni 3 qılə diədə kamşaqirdinə məktəbon dəbastəşone.

Jiqo vəziyyət Liki rayoni Qendov diədən mevcuse. Hırdənon ımsorku hamsuə Buludul diy məktəbədə hande məcburiyyətədə mandən ki, çey məsafən 3 km-e. Im dion arə ro bərbod vəziyyətədey. Diy sakinon bə rayoni rəhbəriyyəti bə ım roy hiç nıbo xırış oğande həxədə xahişon benəticə mandən. Sosial şəbəkədə yuzeron xəbə dodən ki, Liki rayoni bəzi məktəbonədə bə şaqirdon dərsə kitobon doəşon ni. Bə valideynon məsləhət zınəşone ki, boştə hırdənon dərsəkitobon bışon Lankoni kitobə məğəzenədə bıhırion. Hərçənd ki, həmonə kitobon  devləti tərəfo bə şaqirdon bepul doe nəzərədə qətə bıə.