Bə Tolışıston ovayz omə

Oktyabri əvvəliku Tolışıstonədə bino bıə mevsumiə voş-vəşə bə xeyli mışğılaton səbəb bıə. "Report" sayt xəbə dodə ki, bə Cənub reqioni ruon ovayz ome nəticədə 10 qılə pard rıjiə. Ələt-Hostoro maqistral şosse ro Velədi əraziədə tək bə əməl omə.

3 sutkə muddətədə qurçəkə voşi befasilə voe bə Vazəru, Uliməru, Sodəşəru, Qırdəni ruon ovayz vardışe. Lankon şəhəri, Qırdəni, Şovu, Məlodi, Ənoəboğ, Rvo, Ləj dion ərazi xeyli hissə ovi jitono mandə. Əşlə, Vılvon, Bolədi, Havzəvu, Tuədo dionədə pardon ovi bardəşe. "Bəşəru" istirahətə mərkəz, Tanqəbın di ibtidai məktəb ovi eğətəşe. Bə Lik şə elektrik xətti sunon ovayzi rıjniəşe. Qəqıron, Tuədo, Bəleton dionədə zəmini luə doəşe. Lankon - Lik şosse  18-minə kilometrədə band rıjiə, ro pebırniəşe. Lankoni şəhəri 150, dionədə bə 400 qılə təsərrufati ziyan qıniə. Bırədiqo ğəsəbədə 100 qılə kə ovayzi eqətəşe. Ğəzo nəticədə elektrik və ğazi doemonədə fasilon bə əməl omə. Fevğəladə Halon Vəzarəti Cənub Reqional Mərkəzi ım ovayzi nəticon çe arə barde ro tədbiron vindedə.

"Cənub xəbərləri" sayt məlumat dodə ki, Hostoro ruy peşe səbəbiku Sefəriboğ, Ruəkəno, Məcitməhəllə dion ovi jitono mandə.    FHV həmkaron 50 qılə ailə de kuloson təxliyyə kardəşone. Varqədiz rayoni Deryavo diədə qıley "Cip" avtomobil ovayzi bardəşe.

Tolışıstoni ım rayonon əlağədar təşkilaton ovayzi bə əməl vardə mışğılon çe arə barde ro lozımi tədbiron bə jimon dəvunidən.