Hokuməti tolışə milliə siyasi fəal Mətləb Dadaşov dızdiəşe

Boku hokuməti bə dini və siyasi fəalə şəhrıvandon munasibətədə ğeyri-ğanuniə hərəkəton dəvom kardedə. Dekabrə manqi 4-minə ruji Respublika zorə strukturi həmkaron Masəlu rayoni Sığdaşt diədə ım diy sakin, Tolışə milliə fəal, Respublika Rəssamon İbemoni uzv Mətləb Dadaşov dızdiəşone.

Çə vaxtnəku 4 ruj dəvardə, çey xeyzoni və duston bə Az.R muvafiğ huğuğ -muhafizə orğanon kardə muraciəton hiç nəticə doə nişe. Dadaşovi telefon, həmən Varsap səhifə oje, əmo bə zanqon cəvob dodəni.

Boku hokuməti jıqo ğeyri-ğanuniə hərəkəton iminə kərə ni. Tosə ısət bə dini və siyasi fəalon əleyh bə çand bəjəm ım curə hərəkəton dəvom kardəşe.

Tolışə ictimai təşkilaton və çəvon sərdaron bə Əliyev hokuməti ım repressiv hərəkəti ıştə etirazon bəyon kardışone. Rusiyadə "Tolışə diaspora" təşkilati sədr İsmayıl Şabanov, Moskva və Yekaterinburği Tolışə Milliə Mədəniə Muxtariyyəton sərdaron Adil Nəsirov və Elşən Həsənov ıştə bəyanatonədə Əliyev hokuməti ım ğeyri-insonə hərəkət məhkum kardışone, beynəlxalqə ictimaiyyət dəvət kardışone ki, jıqo hərəkəton orıxnie bə İlham Əliyevi nəzə bırosnon.

Tolışə Sipirişon Şuran de ım məsələ əlağədar dekabri 7-ədə ıştə işlas dəvunişe və qıley bəyonat doşe. Bəyanatədə ğeyd kardışe ki, çe Az.R  beynəlxalqə aləmədə nufuz xeyli sarue, çey jıqo ğeyri-humanistə qəmon bə məmləkəti imici qıleyən zəbə jedə. Tolışi siprişon Respublika hokumətiku Mətləb Dadaşovi dərhal sərbəst vadoe tələb kardışone.