"Tolışon sədo" rujnomə 101 -minə numrə çe çapo beşə
"Tolışon sədo" rujnomə de Rafiğ Cəlilovi sər redaktorəti ıştə fəaliyyəti dəvom kardedə. Imsornə 8-minə, umumən isə 101-minə numrəş bı rujonədə çe çapo beşə.
Rujnomə bənə har numrə ım numrəşən de muxtəlif mevzuədə məğalə və ədəbi materialon ğəncine. Sər redaktor ıştə de Turkiyə Az.R-ədə səfarəti molağati dəvomi, rujnomə dəvardə numrədə bə ım səfarəti vığandə muraciəti nəticon, Rusiya Xariciə Koon vəzir Serqey Lavrovi bə Boku səfərədə bə qıley tolışə valideyni medal təğdim karde barədə 1-nə səhifədə bə əhandon məlumat dodə.
Ğərəboği muharibədə xəyanəton həxədə polkovnik Mikayıl Hacıyevi xatiron, tolışə ədib Suleyman Huseynovi tojə romani nəşr bıe və Sumğayiti Poeziya Kədə çey təğdimati dəvine xəbə rujnomə 2-minə səhifədə bə əhandon edaştə bıə.
Rafiğ Cəlilov ıştə redaktorə məğalədə çe Respublika Təhsilə Vəzarəti vədə Tolışə dərson tədris nıbe, bımi ro dərsəkitobon nəşr nıkarde səbəbon barədə parson nodə və ım məsələ həmişə çe rujnomə diğğəti mərkəzədə oqəte sıxan dodə.
Redaksiya bı numrədə 2 nəfər cıvonə şair - Rəhimi Yusif və Məmiyev Elcani bə əhandon edaştəşe, çəvon şeeron 6-minə səhifədə dərc kardəşe.
Im numrədə həmən çe Allahverdi Bayrami, Nəriman Tolışi, Camal Lələzoə, Xanəli Tolışi, Baladdin Veşo, Elxan Zəviləvoji, Aqşin Dadaşzadə, Fuad Mondiqovoji şeer və hekayonən dərc bıən.
