Paşiniyani bə Boku itərəfinə imtiyazon, Ermənistoni milləti hevujə etırazon

Bə Azərbaycan Respublika ərazi itərəfinə aspardə bey və bə İlham Əliyevi devləti daimə imtiyozon doey ələyh, Ermənistonədə milləti etırozon bə da minnə ruj varid bıə.

Həminə cəhətədə, İrəvani mərkəzədə çand həzo nəfər qırdə bin və ijən ermənistoni iminnə vəzir, Nikol Paşiniyani istefo və bə kəno noey tələb kardışone.

Im mitinq və etırozonədə əcumlə nıtğəkəyon Erməni kilsə nımoyəndə, yolə yeposkop, Baqrat Qalestaniyan be. əv bə kişvəri iminnə vəzir 1 saət ultimatum doşe ki kiistefo bıdə.

Baqrat Qalestaniyan ki ım mesaji bəpeşt, Paşiniyaniku hiç cəvobi sıeydə ni votışe: etırozəkəyon meydon tərk nibəkan və bəştə etırozon dəvom bədon.

Tosə ısət, Ermənistoni əmniyyəti ğıvvon və polis, 150 nəfəriku vey dastqirışon kardə.

Əmmo Mayə manqi 4 minnə rujiku Ermənistonədə milləti etırozon tojə devrə Tavuş ostaniku binə bıə ki etırozəkəyon miğdor bə 1000 nəfər rəsə be. ım devrə erırozonədə, de co qılə etırozon tafutış be boçi ki dəvardə etırozonədə qıləy siyosətmədor ya hərbi ali rəsmi şəxs etırozon bəştə ehdəş peqətəş be əmmo ım devrə etırozon bə Ermənion yolə yeposkop rəhbəri be.ım yolə yeposkop Tavuşi Erməni kilsə yole və hiç vaxt Ermənistonədə siyosi və karropsiya koonədə nıbe.

Baqrat Qalestaniyan elonış kardə ki "vətəniro Tavusi" nomo ğiyom və hərəkəti rəhbəri kardedə.əv ijən təsdiğış kardə ki nə ım ki Erməniston və Azərbaycan Respublika miyono delimitasiya və demarkasiya muxalifətış ni, bəlkəm Azərbaycan Respublika mənafe və tələbon icro kardey və ərazi aspardey itərəfinə icro beyro muxalife.

Baqrat Qalestaniyani nıtğonku jığo bə nəzə rəseydə ki çəy muhimmə tələb, Ermənistoni iminnə vəzir, Nikol Paşiniyani etefo be. bəpe bıvotəmon ki demi həm ki Qalestaniyani İnğilisi resvo bıə kişvərədə ijən Kanadaədə təhsil iyən xıdmət kardəşe, bə Ermənistoni hakim bıə partiya nezə mediyaon əy bə Rusiyə məxsusə sistemonro ko və fəaliyət kardey mıttəhəm kardedən.

Im qıləy holədəy ki şəxsoni hestin ki Qalestaniyani qıləy milləti xotircəmə şəxse zıneydən, əvon vey Rusiyə sakin bıə Ermənion və Ermənion Diyaspora hestin. 

 Əzizon Ermənistonədə milləti cari etırozon barədə bəpe bıvotəmon ki bə Azərbaycan Respublika Ğəzax məntəğəon və Ermənistoni Tavuş məntəğəon miyono marzi sazışon xoto, cari ixtilafon icod bıə.

Bə ım sənədi əsos, Erməniston bəpe 4 qılə marzi di ki Milodi 1990 minnə sorədə Ğərəboğ canqədə işğolış kardə be bə Azərbaycan Respublika obəqardono.

Demi həm ki İrəvan devləti rəsmi şəxson elon kardışone ki Erməniston və hakim bıə partiyaro ım etırozon təhdid icod nibəkarde bənəzə rəseydə ki ım etırozon mumkine 48 sornə Nikol Paşiniyani sərvəzirəti bə oxo bırosno.