Bə Rəfəh həmlə kardey, israili iminnə koonku qıləyni
sionist rejim Ğəzzə tanqə cənubədə bə Rəfəh marzi şəhri həmlə kardey insoni nəticəon barədə bə dınyo notaon tələbon be etıno bey, ıştə zırehinə hərbiçion bə ım məntəğə səmt vığandəşe.
Rəfəh marziyə şəhr, Misri kənoədə bənə Ğəzzə sakin bıə Fələstinıjon yeqanə dəvardəço bə hisob omeydə ki Oktiyabrə manqi 7 minnə ruj və Ələğsa Tufani əməliyoti bəpeşt, və bə Ğəzzə israili ərtışi həmləon tojə devrə bəpeşt,Fələstini avarəon vey muhimmə sakin bıə vırə əvəz bıə. Bə həminə məsələ xoto, beynəlxalğ təşkiloton və co qılə kişvəron bə Rəfəh həmlə kardey nəticəon barədə ıştə nota elon kardışone ki ehanə,ım məntğədə sioniston hərbi əməliyot icro nıbu, Rəfəhədə Fələstinıjon mislış nıbıə qenosidi şoyd bəbemon.
İsraili ərtışi zirehinə ğıvvon varid bey barədə, raporton muntəşir kardey qıləy holədəy ki İşəmbə şəvi bə ım məntəğə avarəon kəmp, sioniston cinoyətkoronə həmlə cərəyonədə, 45 nəfər Fələstinıjon ki vey jen iyən hırdənonin şəhid bin və minimum 250 nəfər həmn zəxmin bin.
Im həmlə de həmmə kişvəron reaksiya dim bə dim bıə hətto ım rejimi Avropa himoyədoron həm israili ım hərəkəti məhkumışon kardə əmmo bə Rəfəh həmlə kardey, ım rejimi isror, Fələstinıjon tum bırniyeədə ım rejimi cinoyətkorə xusiyəti nışonəy.
Sioniston, bə Rəfəh həmlə kardey plani qıləy şəroyetədə təğib kardedən ki cımə rujədə, beynəlxalğə cinoyət məhkəmə de 13 qılə muvafiğə sədo və 2 qılə muxalifə sədo vositə, ım məntəğədə israili əməliyoti təcili vəy qətey hukmi sadir kardışone və bə Ğəzzə humanitarə koməkon varid beyro Rəfəh dəvordəço oj bey tələb kardışone.
Bə oxonə statestikaon əsos, Oktiyabrə manqədə Ələğsa Tufani əməliyoti bino beyku tosə ısət, 36 həzo nəfəriku vey Fələstini millət şəhid, və 81 həzo nəfər həm zəxmin bıən ki vey ğıbon bıə kəson hırdənonin. İjən 80 fayiz kəon və məntəğə strukturon təsisot həm xərob bıən.
Im mislış nıbıə tuməbırə cinoyət, çand kərə de beynəlxalğə təşkiloton xususi İ Bıə Milləton Təşkiloti sərkotib məhkum bıə. Həminə rabitədə, Fələstini koonədə İ Bıə Milləton bəşər həxon məxsusə repartiyor, Françeska Albanez Ğəzzədə cinoyəton vədə, sionist rejimi cəvob nıdoeyku ıştə təəsufi elonış kardə və votəşe: israil de kali yolə ğudrəton himoyə, oşko surəti beynəlxalğə prinsipon darşteydə.
Həğiğətədə sionist rejim əlovə bə Ğəzzə muxtəlifə məntəğəon bombardımon kardey,, de vəşyəni siloh və damon iyən xorək maddon vığandey vəy qətey vositə, Ğəzzədə bə qenosidi əlovəş kardə.
Im qıləy holədəy ki İ Bıə Milləton Təşkiloti əmniyyət şura qıləy ğətnomədə sionist rejimiku tələbış kardə ki Ğəzzə tanqədə bə Fələstinıjon muhimmə koməkon rosniyero həmmə hərəkəton əncom bıdo.
Demiyəm, sionist rejim de Amerkə himoyədorəti ijən bə Ğəzzə beynəlxalğə koməkon vığandeyədə problem icod kardedə. de Im təzyiğon bəico, de ım oşkoə tuməbırə cinoyəti rabitədə, beynəlxalğə təşkiloton və həmmə kişvəron rol ifo kardey torixədə ğeyd bəbe.
