Qıləy ru ki bə dıyo səmt şə...
Muhəmməd Əli Bəhməni barədə məxsusə bərnomə
Həşi 1321 minnə sori Fərvərdinə manqi 27 ya Milodi 1942 minnə sori Aprelə manqi 16 minnə rujədə, Dezfulədə Muhəmməd Əli Bəhməni bə dınyo omə iyən ıştə hırdənəti və necıvonəti devroni, Tehron, Kərəj və Bəndər Əbbasədə dəvordonişe. Çəy inə İronədə Fransə zıvoni iminnə elm omutə kəsonku be və əv de Fransə və Ərəbi zıvonon oşnoş be. Vaxti həmmə hırdənon qırdə əbin, çəy inə ya şahnomə əhandi və ya Hafiz və Sədi əhandi. Bəhməni 10 sorış heste be ki qıləy çayxonədə de ko kardey məşğul bıə. “ruşin fikə” jurnali de ım çayxonə vositə muntəşir əbi və məşhurə şair Fereydon Moşiri ım jurnali səhifəonku qıləyni məsul be. Fereydon Muşiri iminnə kəs be ki ım hırdənədə şer votey istidodış kəşf kardə. Bəhməni 10 sorəti sinədə bo ıştə inəro ıştə iminnə şeri votışe və Ruşin Fikrə jurnal həm çəy şerış muntəşir kardə.
Həşi 1345 (1966) minnə soriku Muhəmməd Əli Bəhməni de Rədyo ıştə ko həmkoəti binoş kardə və (Səfheye Şer) ya Şeri Səhifə nomo bərnomə de Farsi Dıyo ostani kanali həmkoəti icro əki. Peşo əv de ədəbi nəşrçiyon ıştə həmkoəti binoş kardə və ım royku ıştə əsəron muntəşir əki. Həşi 1351 minnə sorədə Muhəmməd Əli Bəhməni iminnə şeri məcmuə de Bağe Lal nomo unvani muntəşir bıə. Və ım əsəri muntəşir bey dumoədə, vey əsəron bə muxatəbon dast rəse. 2 qılə məcmuə əsəron əcumlə, (qahi zəmon boştə çımı dıl tanq bəbe) və (şayir məsənine) ım şairi kornomədə vey məşhurə əsəronku bə hisob omeydə.
Həşi 1385 minnə sorədə ğəzəl baxşədə Bəhməni kişvəri vey barzə şayir bıə. İyən Həşi 1385 minnə sorədə, Fəcri şeri festivali iminnə devrədə de Huseyn Munzəvi bə ico, klassik şeyri baxşədə vıjniyə bıə və şeyri əbədi simoon siyohədə ğərorış qətə.
Əzizə həmzıvonon, Muhəmməd Əli Bəhməni 82 sor jimonnı kardə və ım soronədə muvəffəğ bıə deştə şeron vositə,veyə zəxmon çok bıko. Muhəmməd Əli Bəhməni şer ım cəhətiku muhimme ki ımrujnə insoni rujqori ovəynəy.
Əzizə duston, dəvardə zəmonon tosə ısət, Farsi şeronədə folkolorik ədəbiyotiku istifodə kardey, bə ım ədəbiyoti sodə qəncinəti xoto ki adət-ənənon, etığodon və bovəonədə rişəş heste və ə şayiron ki muvəffəğ bıən ıştə şeri zıvoni bə adi zıvon və ton nez bıkon, vey məxsusə vırə soybin. Be şək karde bəznemon Muhəmməd Əli Bəhməni əcumlə şairon bə hisob biyəmon ki muvəffəğ bıə ıştə şeri zıvoni bə adi milləti folkolor və adi toni nez kardey xoto, nuyə metod icod bıko və de diğğət bə məhdudiyətoni ki ğəzəl, sıxani həmohənq bey cəhəto soybe, muvəffəğiyəti roy dəvordonişe.
Bəhməni de nimə ənənəvi ğəzəlon votey vositə, mıosirə şeri royədə vey muhimmə qəmış peqətə iyən de kuçə və vıjori zıvoniku istifodə kardey və vey sodə sıxani vositə, ıştə şeronədə vey həyrətomizə mənoon de şikili vositə nışo ədi. Bəhməni şikili komil kardeyədə vey istidodış heste be və bo ıştə fikədə şikili komil kardeyro ıştə ətrofədə həğiğətonku istifodə əki.çəy şerədə tikrori şikilon de kanə ranqo bu vindey beydəni, bəlkəm vey ım şikilon şairi ixtiro ya soxteye və bənə tabloon muxatəbon çəşon vədə dəvardedə və əv bə veyə ləzət və nığılə dərk rosneydə.
Im hınə soybi nom və yod qiromi və çəy ruf şo bıbu.
