Ğərbi kapitalistə sistemi de jenon çiçış karde?

Pars-Tudey- Ğərb həmişə çe ozodəti və bərobərəti mıdofiyəəkə iddiyoş kardə,lakin bəçəy sosyal və ixtisodi strukturon nığıləti nəzə kardeyədə,əmə de ın iddiyo bə şubhə ji bardə fakton dimbədim omeydəmon.

8 Mart Jenon Ruj nom noey bıə və Ğərbi rəsmi medya və cərəyonon ıştə cəmiyyətonədə çı jenon ozodətiyonku qəp jeydən,əmmo lıski çe neziku nəzə səğandəmon,qıləy farğinə həyğət oşko bəbe.

Bə Pars-Tudey hisoboti əsos,Ğərbədə sərmoyədor iyən kapitalistə sistem fəğət patriyarxal nizom ni,bəlkəm əyo kapital və mənfəət çe insoni erjonku,ə cumlə çe jenon ləyoğətiku həm bəpeye.

Bın sistemədə jenon dıqlə əsosə şikilədə istismor beydən:ko sahədə və şəxsiyyəti ərsədə.

Ko sahədə jenon de merdon eyni ko vindeydən,əmmo kamə maaş seydən.ım qenderə farğon ğabiliyyəti farğonədə ni,bəlkəm ım jenon fəğət bənə erjonə ko ğıvvə təki vində instrumental nəzə nəticəy.

Bəpe çe viro bekardey nıbu ki,Sənaye İnğılobi zəmonədə jenon çəvon kəon iyən çəvon ənənəvi koonku co kardə və əvoni bə fabrikon məcbur kardə eyni kapitalistə sistem be.dəğiğən bənə Afrika bumi iyən aboriqenə mərdumi istismor kardero istifodə kardə bıə şivə.

Əmmo şəxsiyyəti sahədə vəzyət həni həm mırəkkəbe.Ğərbi istehlokçi mədəniyyətədə jenon bo merdon ləzzət bardero bə molon təbdil bıən.Reklamon,moda sənaye və seksi sənaye jenon bə seksual cəlbəkəti səmt sevğ doydə,hətto ko elononədə həm çəvon fiziki andom çəvon məhorət iyən ğobiliyyətonku vey muhim hisob kardedə.

Imruj bənə “Onlifans”-i bıə Ğərbi sosyal şəbəkəon bə jenon bədəni rəsmi ğıymət doydə və çəvon istedodon nəzədə qəteydəni.jıqo qıləy nəzə çe jenon kəromət iyən ləyoğəti darıştey kəno,həmən çəvon moəti erji həm saru vardedə və bə şua ji dənoydə iyən əy,bənə bə “tərəğği” mane bıə amili təğdım kardedə.

Nəticə çiçe?

Ğərbi jenon sosyal status kəsb kardero bə kapitalistə merdon mıəyyən kardə standarton mıtobiğ məcburin ıştəni əvəzkon.Lakin demi həm Ğərb ın prosesi “çe jnon ənənəvi məhdudiyyətonku ozod  kardey ” zıneydə.çən,ım,həyğətən həm ozodəti iyən bərobərətiye?

Təbiyie ki,ım strukturi tənğıd kardey Ğərbi cəmiyyətonədə çe jenon səyon və səbarzətiyon nəzədə nıqətey mənoədə ni.veyə jenon,kinon və moon bə mevcud bıə maneyəon rəğmən,elmi,idorəçəti və mədəniyyəti sahəonədə ovandətişon bə dast vardə.Əmmo ım səbarzətiyon nığılə strukturi ziddiyyəton və nobərobərətiyon həm nəzədə qəteydəni.