İroni təhsilinə jenon qlobal elmi arenada kom mevğeyədən?

Statistika nışon doydə ki,İron İslom Respublikə de bə İslomi erjon peştıpur bıə holədə akademik sahədə bo jenon statusi çok kardey və bə qender ədoləti noyil bey istiğomətədə təsirinə qəmonışon peqətə.

1979-ə sori İroni İslomi İnğılobi ğələbə bədiqə bo jenon bə elm və texnoloqiya kəsb kardero unversitetonədə zumandə mevğeşon qətə.Pars Tudey-bın məğolədə əmə bə çın mıvəffəğətiyon kali qıləyniyon nəzə səğandedəmon.

İron İslomi Şura Məclisi Jenon və Aylə Fraksiya rəhbər Zəhro Xodadadi bın rujonədə elon kardəşe ki,ımruj İroni unversiteton məzunon 60 fayiziku veyni jenonin və ironıjə jenon mıxtəlifə sahəonədə,ə cumlə həm tibbi,muhəndisəti,huğuğ,humanitarə elmon,informasiya texnoloqiyaon və nəciməsənətədə rol ifo kardedən.

İronədə bə ali məktəbon ğəbul imtovon nomizədon çand  fayiz jenonin?

Bın miyono İron İslom Respublikə Elm,Tədğiğot və Texnoloqiya vəzir Huseyn Simayi-Sərraf bə ironıjə jenon unversitetonədə iştiroki ğəbul kardey və bə ğəbul imtovononədə jenə nomizədon ədədi ziyodəti işorə kardə holədə votəşe:Bə İronədə doə bıə statistika əsosən,ğəbul imtovononədə iştirok kardə nomizədon təxminən 63 fayizi jenon təşkil doydə.

Milli və beynəlxalğə səviyyədə həmməysə veyə istinod kardə bıə tədğiğotçiyon siyohiyədə 18 qılə ironıjə jenə tədğiğotçi heste.

Diqər tərəfiku,bə İslomi Dınyo Elm və Texnoloqiya Sitat və Monitorinq İnstituti dərc kardə hisoboti əsosən,Tehroni Unversitetiku 18 qılə jenə tədğiğotçi milli və beynəlxalğə səviyyədə həmməysə istinod kardə bıə tədğiğotçiyon siyohiyədəy.

Çın nomon bəziyon ımonin:Fərnuş Fəridbud,Fərzane Şemirani,Fereshte Reşçi,Zəhro İmamjume və Məryəm Səlomi.

Bo İronıjə jenə alimi nufuzinə qlobal mukofot

Təhsilinə İronıjə jeni misol Tehroni Tibb Elmon Unversiteti İron Tibbi Fakultə Ənənəvi Əczoçəti sahədə professor Dr.Roca Rəhimi nışon doey bəbe.Əv,2025-ə sori Bionorica Phytoneering Mukofoti ğalib elon kardey be.Almaniya Bionorica şirkəti tərəfiku məşhurə tədğiğotçiyon doə bıə beynəlxalğə mukofot fitofarmasevtik məhsulon(beməyonku hozzı kardə bıə damon) hozzı kardey və tətbiği sahədə bənə qıləy məşhurə tədğiğotçi zıney beydə.

12 qılə ixtiro iyən patentış bıə ironıjə banu

Hollandiya,Amsterdam VUMC Universtetədə Nanom tibbi shaədə fəlsəfə doktor bıə məşhurə ironıjə banu "Bibi Fatmə Həğir-Sadat" İronəda təhsil seyə mıvəffəğə banu coqlə numunəy.Əv,bə elmi əsos bıə seqlə məhsuli istehsol kardeyku fəxr kardedə, bə qılə 12 patenti malike və 70-sə veyə bumiyə və beynəlxalğə loyihədə iştirok kardedə.