Boçi dınyoədə dollarizasiya əlovə bıə?

Çini ticorətədə Yuan-i səhm bə 53 fayiz rəsə iyən i minnə kərə torixədə çı Dollariku dəvarde.In muhimmə əvəz qıləy şəroyetədə icod be ki həminə səhm milodi 2010 minnə sori sıfır(0) be.

Koşınason votedən ki jığonə əvəzon nəınki Çiniro, bəlkəm dınyoədə qlobal ticorətiro bənə qıləy tojə nəzmi yod kardey bıdə ki çəy məno jığo təhlil kardey bəbe: Dınyoədə həni Dollar bənə i minnə rol ifoəkə ni – Beynəlxalğ ticorəti tojə nəzm təşkil bey holədəy iyən dınyo çı Dollariku dəvardey holədəy.

Bə Amerkə təhrim-təzyiğ siyosəton reaksiya nışo doey xoto kişvəroni bənə Rusiyə, Hinduston, Çin, Rusiyə, İron, Braziliya və hətto kali Avropa məmləkəton Dollariku xilos beyro vey faxton bıdə ki tojə strateqiyaon vıjniyəşone.

Həminə cəhdonku vey əsliyə koy, 2 tərəfi iyən çand tərəfi ticotərədə milli valyutaonku istifodə kardeye. əvon hətto bənə BRİKS ya co təşkiloton tərkibədə bumi maliyə sistemon soxtey fikədən.

Dollariku bəkəno ticorəti inkişof doeyro Rusiyə kişvəri bənə navəjəni bə hisob vardey bəbe.

Rusiyə rəsmən elonış karde ki de Mərkəzi Asiya kişvəron maliyə rabitəon lokal pulon çərçivədə əncom bədoy, jığo votey bıdə ki ısət həminə reqiyonal ticorəti miğdor bə 45 milyard dollari rəseydə.

Prezdent Putin tojədən təkidış kardə ki ın koy və əvəzonku hədəf harçiku vey çı kişvəron maliyə istiğloli oqəteyro əncom bıdə.

Çin həm beko mandəni və çand sor bıdə ki dıştə hədəfinə siyosəton cəhd kardə ki dınyo ticorətədə Yuaniku istifodə bey zəminə çimiku vey inkişof bıdə.

Çini dıvləti soyosətonku sıvoy məhsulon ixracati, bəbe bə: Sərmoyəon kontroli kam kardey – Daxıli maliyə vojoron cəzzob nışo doey – Xarıci investoron vanq kardey – Bankon miyono maliyə sistemi inkişof iyən bumi dicital valyuta işorə kəmon.

Bə beynəlxalğ maliyə mərkəzon statistikaon raporti əsos, Milodi 2025 minnə sori dınyo ticorətədə Yuani səhm bə 817 milyord Dollari rəseydə ki dəvardə sori muğayisədə 9 fayiz rost bey nışo doydə.