Avropa İttifoğ boçi bə Amerkə sosyal şəbəkəon ələyh beşə?

Avropa Komissiya Facebook,Instagram və TikTok-ış de Aİ dijitalə ğanuni darıştey və şəffofəti nıbeyədə mıttəhəmış kardə və əvonış de qonə cəriməon təhdid kardə.

 Bə Pars Pars Tudey doə məlumoti əsos,Avropa Komissiya Facebook,Instagram və TikTok-u Aİ dijitalə ğanuni darışteyədə ittihomış kardə.Bə məlumoton şəffofəti nıbey səbəbiku ehyanə ın şirkəton bəroətədə dəlilon təğdım nıkon və ya islohoton nıbardon,bəvədə de qonə cəriməon dimbədim omey bəzıneyn.

Avropa Komissiya istifodəçiyon Instagram və Facebook-ədə şikoyət kardey usulonədə nırəsə cəhəton oşkoş kardə və holı-hozədə bə AİŞ-on ovoştıney prosesədə bıə TikTok-i mustəntiğon məlumoton kifoyət ğədərədə daxil bey imkoni nıdoey və demi həm bə mıstəğilə nəzorəti mane bey votey beydə.Platformaon həmçinin de profilon blok kardey və ya şəron darıteyro ıştə noə mətləbi pok kardeyədə ittihom beydən.İstifodəçiyon bə Aİ ğanunon əsosən bə ın cur ğəroron apelyasiya şikoyəti doey huğuğış heste.bə Aİ Komissiya əsos,bo Facebook və Instagram-i şikoyətçiyon vohidə əloğə noxtə heste və zərər vində kəson əyo ıştə subuton təğdım kardey nibəzıneyn.

Avropa Komissiya həmçinin çe istifodəçiyon tərəfiku ğədəğən bıə məzmun və ya dezinformasiya barədə məlumat doeyro sistemi ğeyri-kafi hisob kardə holədə,çəy Facebook və Instagram-ədə çok ko nıkardeyış bəyon kardə.Platformaon həmçinin hisobotonr təğdım kardə holədə bə şəxsi məlumoton tələb bey xoto tənğıd kardey bıə.Instagram və Facebook bə Meta qrupi ayide.

In qəm Aİ dijitalə ğaydəon tətbiği sahədə dəvom kardə səyon iqlə hissəy.Meta,Aİ ğaydəon darışteyədə ittihom bıə dıminə AİŞ platformay.çımi bənav Elon Muski X Platforma 2024-cə sori iyulə manqədə analoji cinoyətonədə ittihom bıəbe.

Avropa Komissiya bəyonotədə bəyon bıə ki,Facebook və Instagram beğanunə məzmuni barədə məlumot doeyro bə kifoyət ğədərədə bıə avjoron malik ni və istifodəçi interfeyson bə mınhərifəti səmt sevğ doə şikilədə dizaynışon kardə.İstintoği diqər hissəon,ə cumlə həm platformaon bəştə nevcıvonəti sinni nırəsə kəsonku çokonə mıhofizə kardey və çəvon səçıni manipulyasiyadə bıə rol hələm həm dəvom kardedə.

Avropa ibemonədə bə şirkət və TikTok-i vidyo platforma ələyh de Aİ Dıjitalə Xıdməton Ğanuni(DSA) darıştey iddiyon anqıl co huğuği tədbiron həm vindey beydə.In tədbiron,çe diqər tədbiron kəno,hırdənon iyən nevcıvonon çe hoziyəti iyən beəxloğə məzmuni təsviriku xandi kardey anqıle.In,çe Trampi administrasiya de Çini TikTok-i AİŞ-ədə bıə əməliyyoton bə lokalə konsorsiumi ovoştınə bo qıləy mığovilə imzo kardero hozzı bıə qıləy vaxti təsaduf kardedə.Bə Wall Street Journal qəzeti məlumoti əsos,Oracle,Silver Lake və Andreessen Horowitz AİŞ-ədə bıə TikTok-i 80%-sə ziyodə soyb bəbe,əmmo əmandə səhmon bə Çini səhmdaron məxsus bəbe.

Şirkəton ısət bə Avropa Komissiya tələbon cəvob doey və quzəşton həm kardey bəzıneyn.Əqər əvon ımi nıkon və ya Avropa Komissiya əvoni kofi hisob nıko,hasornə qlobal devriyyəon de 6%-i cərimə dimbədim omey bəzıneyn.

Bə ın ittihomon cəvobən,AİŞ Ticorət Vəzirəti həm daxil bıə holədə,AİŞ rəsmiyon de Aİ "saxtəti və diskriminatikə nəzə" anqıl ıştə norohətçətiyon ifodə kardəşone.əvon jıqo hisob kardedən ki,ın tədbiron Amerkə texnoloqiya şirkəton bə Avropa vıjoronədə bıə fəoliyyəti bənə qıləy maneə ğəbul kardey bəbe və ozod rəğobəti təhdid kardedə.Əslədə,ısət Donald Trampi prezdentəti dıminə devrədə Avropa de AİŞ miyono rəğobət çe ticorət və ixtisodi sahəon kəno,bə internetə və sosyal şəbəkəon həm pevolo kardə.

Lakin,Avropa Komissiya bə Amerkə sosyal şəbəkəon ələyh rost kardə iddiyo qlobal dijitalə platformaon tənzim kardeyədə sıftənə noxtə təbdil bey və texnoloqiya sahədə transatlantik ziddiyyəti ziyod kardey bəzıne.