Dezinfo|Çıro Slavoy Jijek dərəsedəni?

Pars Tudey- Sloveniyəvıjə filosof Slavoy Jijek qıləy məğolədə İronədə ovi məsələsəş bərrəsi kardə və mubahisənin və xəyolpərəstə bəyonotonış doə.

Bə Pars Tudey məlumoti əsos,"Avropə Ali Təhğiğot Məktəbi" fəlsəfə professor Slavoy Jijek 16 dekabr 2025-ə sori torıxədə Korean Times veb saytədə dərc bıə"Qıləy zəmon ki,Kommunizm yeqanə səçıne" nomo ğəribə qıləy məğolədə İronədə,xususən həm Tehronədə bə voşi kam voyey işorə kardə holədə,ımış bo mıosirə cəmyətonro ekzistensial(vucudi) təhdidon nımunəş hisob kardə.Jijek heyrətamizə şikilədə təkid kardedə ki,fəğət de fevğəlodə vəzyəti elon kardey,çe resurson peyo iştimoyi nəzorət və de qlobal həmkoəti sosyal kollapsi navi qətey bəbe.Əv,ım yumoristik nəzəş "zəruriyə kommunizm" zınə.Əv,iddiyo kardedə ki,İron həm daxil bıə holədə,çe ovi problemi həll kardey çe "kommunizm"-i forməy.  

Çın avropəvıjə filosofi,xususən həm de İron iyən voşi kam voyey anqıl fikion barədə bəpe ımon  ğeyd kardey bıbu:

1-Bə İron səyohət kardə holədə de vəzyəti mışohidə kardey çe vəzyəti realəti obyektivə şikilədə təhğiğ nıkardey,Jijek çe Tehroni ovi problemi və de çın şəhri əhali vəzyəti əloğədor fəğət çe Ğərbi medya duyə və ğərəzinə məlumoton və təsviron əsos qətə holədə ğəribə iddiyonku bəhsış kardə. Min cumlə ıme ki,çe Tehroniku çandə həzo insonon bə şimol və bə Kaspi dıyo səmt dəvitiyən və əqər ın rəğəm bə çandə milyon nəfəri bırəso,bə Tırkiyə və Avropa miqrasiya ləpə bə əməl omey ehtımol heste.

Çəy de Tehroni mərdumi şey anqıl qıləy təmomən məzhəkə fikiş heste və Tehroni camaati bə  şimol və bə Kaspi dıyo sahilon səmt haftəoxo səfəonış bənə çın şəhri əhali ovi nırəsey səbəbiku viteyış şərh kardə.qıləy zəmon çe Jijeki İronədə,xususən həm Tehronədə bənə ovi problemi bıə fenomeni həxədə fikion çe rişəku nodırıst bıbu,əv,çokonə həlli roon,xususən həm i nev zəruri kommunizm,yəni həyoti əhəmiyyətinə resurson peyo iştimoyi nəzorət və bo jimoiro fevğəlodə holon idorə kardey təklif doey bəzıne? Boəy vey çok əbi ki,bə İrona,xususən həm bə Tehroni səyohət bıko və realətiyon muşohidə kardey bədiqə ıştə noxteyi-nəzəku çe həlli roon təklifi bıdo.

2-Jijek bəştə xəyoli fikon əsosən,İronədə bıə ovi problemi cəhəton,səbəbon və nəticəon həxədə bınıvışto həm,Avropa və Amerkə həm daxil bıə holədə Ğərbi kişfəronədə bıə ovi vəzyətiku bəhsış kardəni və fəğət bə Misr və ya Əfğanıstoni kişfəronədə bıə ovi problemon işorəş kardə.Və holınki,qlobal temperaturi vey bey və de ekstremal iğlimi hodisəon pevolo bey,hışkəsorəti həni de qıləy mıəyyənə kişfəri məhdud bıə qıləy fenomen ni;Avropaku bə Afrika,Çiniku bə Cənubi Amerkə kişfəron de ovi problemon mıborizə bardedən,lakin bə ın məsələ reaksiyaon vey farğine. Bın nəzəku,Ğərbi kişfəronədə bənə fəğrəti və bekəti bıə mıxtəlifə problemon kəno,de voşi kam voyey,haruj ziyod bıə ovi ehtiyoton nırəsey və de ğəhəti problemi dimbədim omeydən.Məsələn, İnqilistonədə voşi kam voyey səbəbiku,hukuməti insononku bə ovi istehloki nəzorət kardeyış tələb kardə.Hevujə kişfər bıə AİŞ-ədə ın məsələ,xususən həm çın kişfəri bənə Kaliforniya bıə ğərbi ştatonədə bə vey ciddiyə problemi peqardə.İğlimi əvəzon navko bəy məhəl noey nıbə əraziyonədə hışkəsorəti bə əməl omey səbəb bıə;AİŞ-ədə Missisipi ru ovi cərəyoni kamətiku qətə tosə Avropədə bıə əsosə ru bə hışk qıniye,Afrika Şoxədə bıə humanitarə məsələon və çəy Çinədə bə qlobalə ixtisodiyyoti zəncirvari təsiron,ımruj qəhəti mığyos coğrafi sərhədonku bə kəno beşeydə.Əhəmiyyətinə məğam ıme ki,bəkam bıə ovi ehtiyoton və de hışkəsorəti muborizə roon mıxtəlifə kişfəronədə tafutine və de har qıləy kişfəri spesifikə(xassə) coğrafi,sosyal və siyosi konteksti(zəminə) anqıle.

Və əmmo oxonə sıxan;Tobə ısət Ğərbi veyə filosofon çəy təfəkkuri tərzi,çəy bovəon və ideyaonışon de şiddəti tənğıd kardə.Veyə alimon çe Jijeki nıvıştəyon be etıbo və beməno hisob kardedə.Amerkəvıjə mutəfəkkir və zıvonşınos Noam Çomski çe Jijeki nıvıştəyonış qıləy təyə jestış zınə və bın bovədəy ki,çe Jijeki əsəron bəpe ciddi qətey nıbu.Britaniyavıjə filosof Con Qrey həm bə Jijeki hoziyəti və beməno və puçə sıxanon tarif kardey xoto tənğıdış kardə.

Bə nəzə rəseydə həmonə beməno və puçə prosedura çəmə Jijeki muzokirə kardə bın məğolədə həm tətbiğ kardey be.Çəy İronədə bıə ovi problemi kommunistə həlli təklif,bə dırıst və mehkəmə fikon və məlumoton əsos bey əvəzi,bə ziyodə nodırıstə məlumot və informasiyə cəm kardey və çəvonku nəticə bekardey əsose.