Boçi Yolə Britaniya iştimoyi nəğliyyoti sistem bo mısılmonə jenon təhlukəyne?

Pars Tudey– ؛Britaniyada bardə bıə qıləy nuyə təhğiğoton nəticəon nışon doydə ki,kişfərdə mısılmonə jenon təxminən nimə iştimoyi nəğliyyotiku istifodə kardeyədə ıştəni betəhlukəyn hiss kardeydənin.

 "İnqilistonədə Mısılmınon Tədğiğoti İnstitut"-i nuyə tədğiğoton nışon doydə ki,mısılmonə jenon çın kişfəri iştimoyi nəğliyyot şəbəkədə barzə səviyyədə de təğib,diskriminasiya və noəmni hisson dimbədimin.

Bə Pars Tudey doə məlumoti əsos,9-20 noyabr 2025-ə sori torıxon miyono Yolə Britaniyaədə jiyə 1155 mısılmınon miyono bardə bıə parsemoni əsosədə tədğiğoton,islamofobə hoziyətiyonku norohətəkə mənzərə təğdım kardedə.

Bə parsemoni əsos,bın kampaniyada iştirok kardə mısılmonə jenon 34,3% minimum i dəfə bəisə bə islamofob və ya irğçiyə təğibi hədəfi təbdil beyışon bəyon kardə.Im noəmni hissi nəticə səyohət vərdışonədə ciddiyə əvəzon bıən;69,4% potensiyal təhdidonku tarsə holədə ıştə səyohəti rəftoronışon əvəz kardə.Bə ın əvəzon mıəyyənə vaxtonədə səyohət nıkardey,ıştə oləton əvəz kardey və ya deştə şəxsi hisobon taksiku istifodə kardey daxile.

Bın səviyyədə bə təğibi rəğmən,hodisəon fəğət 12,5%-i bəyon kardey bıə və şikoyət kardə kəson 69% bəçəvon şikoyəton çe polisi tərəfiku ciddi nıqətey bovə kardedən.

In tədğiğot həmçinin təkid kardedə ki,vəzyət siyosi ziddiyyət və ya ifrotə rostə fəoliyyəti devrədə həni həm vey yavə beydə.Bın şərayitədə mısılmonə jenon 96% ıştəni həni bexətər hiss kardedənin və 90%-sə ziyodə bo təhlukə navi qəteyro ıştə səyohəti planon əvəz kardedən.Im,bə əmniyyəti xıdməton və bə polisi bıə etımodi səviyyəş bəkam kardə və çın təğibon veyni bə məsuliyyətiku bə kəno mandey səbəb bıə.

Bə ın nəticəon cəvobən,Britaniya İslomi təşkiloton və əncumənon nəğliyyot orqanon,polis iyən siyosətçiyon bo mısılmonə jenon iştimoyi nəğliyyotədə əmniyyəti ziyod kardero təcili tədbiron vindey vanqışon jeyə.Bımon çe koəvonon islamofobiya mevzuədə təlim dəvordıney tələb kardey və dərhol mıdoxilə və dastəki mexanizmon icod kardey daxile.

Ğataronədəhəm fəğət bo jenon vaqonların icod kardey kampaniya 13.000-sə ziyodə imzoş cəm kardə.21 sinninə London Universitet Kolleci tələbə Kamil Braun tərəfiku 30 sentyabrədə bino bıə petisiya,Britaniya Nəğliyyot Polisi bın kişfərədə jenon sedə iku ziyodə iştimoyi nəğliyyotədə minimum i dəfə bə təcovuzi məruz mandey oşko kardə hisoboti bədiqəçəyklu bəhs kardey bıə.