Amerkə çı İrağ və Suriyə çand poə karde nibəzne.

İraği İslamiyə Əla məclesi rəis votışe: Amerkə çı Suriyə zəminiku kırdon co karde fikədəy əmmo əvon jəqo ki İrağədə kırdon co karde planədə məğlub bıən ijən Suriyədə həm məğlub bəben.

İraği İslamiyə Əla məclesi rəis Həmam Həmudi zinə de İroni islamiyə inğilabi məsləhətçi Əli Əkbər Velayəti vindemon karde jurnaliston cəmədə əlovəş kardə: Amerkə məğsəd ıme ki İraği bə kırd, şiə və sınni ənıştə məntəğəon təğsim bıkə.

Əv bə İrağədə omə parlemantiyə səçın işorəş kardə və votışe: İraği milliyə partiya etığadış heste ki kişvəri səçın ğanun bəbe isloh bey bəpeştə səçın bərpo bıbu.

Əv de İroni rəsmi şəxson vindemon karde əsliyə mıvzoonış DAEŞ-i bəpeştə İraği vəziyət, İroni təcrubəonku istifodə karde və 2 qılə kişvəri miyono iğtisodi həmkarion ziyod karde ğeyd kardə.

Həmçınin 2 tərəf Ğudsi bənə siyonist rejimi paytəxt elan karde çı Trampi tojə hərəkət və ğəroli barədə həm suhbət kardən.

Velayəti həm ım mıloğatədə bə mığovimət cəhbə veyə cəhd Suriyə ərazi təmamiyyəti peştədə mande işorəş kardə və votışe: çı Amerkə orzoon, Suriyə kırdon co karde barədə əməli nibəbe.

İraği Əla məclesi sədr İronədə Tehroni əmniyyət iclosədə iştirok kardero bə İron omə be.