Bəşar Əsəd bə de İron iğtisodi həmkarion inkişof təkidış kardə.

Suriyə prezident de İroni ro və şəhr soxte vəzir vindemon karde bə Dəməşğ və Tehroni miyono iğtisodi həmkarion inkişof doe zərurət təkid kardə.

Bəşar Əsəd zinə ruj Dəməşğədə İroni ro və şəhr soxte vəzir Əbbas Axundi didorədə təkid kardə ki Suriyə və İroni miyono iğtisodi həmkarion zumandəti ğərbi planon vədə mığovimət kardeyro vey muhimmə roonku qıləynie boçi ki əvon icbori iğtisodi canq və sanksiyaonku bə milləton fişar varde, kişvəron mıhosirə karde və bə ğərbyə hakimiyəti siyasəton əvoni vadar karde xoto istifodə kardən.

Əbbas Axondi həm ım didorədə de terrorizm mubarizədə bardeyro Suriyə ərtış və çəy həmpeymanon muhimmə noiliyəton təbrik votışe iyən bə muxtəlifə zəminəonədə Dəməşğiku Tehroni himoyədorətion dəvom təkid kardə.

İroni ro və şəhr soxte vəzir həmçınin elanış kardə ki İron çı Suriyə kişvəri obdon karde mərhələdə fəalə həmkarion xoto hozzoe.

Bəşar Əsəd və Əbbas Axundi həmçınin ım didorədə Suriyə və İroni miyono dustanə rabitəon məxsusən iğtisodi rabitə, 2 qılə kişvəri əloğə səviyə zumand və hevuj karde iyən bə hərbi və siyasi həmkarion miğdor rosniye barədə votemon kardən.

İroni ro və şəhr soxte vəzir pencşambə sıbi deştə heyəti bo İron və Suriyə miyono iğtisodi həmkarion barədə muzakirə kardeyro bə Dəməşğ varid bıən.

Ə çimiku bənav de Suriyə iğtisodi, kə iyən şəhr soxte və nəğliyat vəziron həm didorış kardə be.