Yəməni Ğərbədə dahon nəfər Səudiyə mızdor əsir bən.
Yəməni ğərbiyə sahilonədə ım kişvəri muğavimət ğıvvəon iyən ərtış dahon nəfər Səudiyə mızdoron əsir kardəşone.
Bə Ələhd aqentiyəti zinə ruji raporti əsos, Yəməni Ənsarullah siyasiyə idarə uzv Əli Əl-İmad votışe: ım 160 qılə əsir bə Əlhodəydə şəhri xarıc ovoştoniyə bıən.
Həmzəman Yəməni ərtış Əlhodəydə ostanədə çı Səudiyə koalisiya mıhosir bıə mızdoronku tələbış karde ki təslim bıbun.
Dəvardə çand rujədə ki Yəməni ğərb Əlhodəydə cənob məntəğonədə İ Bıə Ərəbon Əmirəti və Ərəbistoni tojə həmləon benəticə məğlub be, ısət 3 qılə reqionədə bə Səudiyə koalisiya vabəstə bıə niməhərbion, mıhosirə bıən, ijən çəvon rabitə de mudafiə xətti ğət iyən bırniyə bıə.
Eyni holədə Ənsarullah hərəkati siyasiyə şura uzv Muhəmməd Əlbəxiti həm elanış karde: Əlhodəydə canqədə Səudiyə koalisiya və İ Bıə Ərəbon Əmirəti qonə zərər və ziyonon təcrubə kardışone və ısət ım məntəğədə canqi kontorol və mudiriət çı Yəməni muğavimət ğıvvon və ərtışi dastədəy.
Qıle holədə ki dınyo səhihiyyə təşkilat elanış kardə Yəməni ğərbədə bə Əlhodəydə şəhri Səudiyə koalisiya həmləon nəticəku 2 milyon və 600 həzo nəfəri jimoni təhdid kardedə, əmmo ım koalisiya ijən bəştə təcavuz və bombardımoni idomə dodə.
Im təşkilat qıləy bəyoniədə Əlhodəydə ətrofədə bə canqi şiddətin bey işorə və elanış karde ki Əlhodəydə port çı Yəmənıjon jimoni vey muhimmə vırəy ki 70 faiz ım milləti xorak, dəvo-damon və səhihiyyə koməkon ım royku bə Yəmən varid bıdə.
Ərəbiyə koalisiya bə Ərəbistoni və ərəbiyə co kişvəron himoyəto və Amerkə sərkərdə 13 İyonku de vıcud ım ki dınyo Yəmənədə barədə insoniyə vəziyətış xəbədo bıə, Yəmən ğərbədə Əlhodidə bəndərədə bo işğalış karde həmləon bino kardən.
Ərəbiston de İ Bıə Ərəbon Əmirəti, Amerkə və sionist rejim iyən bəzi co mıttəhıdon 2015-nə sori Martiku bə Yəmən hərbi təcovuzi bino kardən ijən ım kişvəri zəmin, osmon və dıyoku mıhosirə kardən.
Yəmənədə Ərəbiston, İ Bıə Ərəbon Əmirəti və de əvon mıttəhid bıə məmləkəton cinoyəton xoto detosə bə ısət 14 həzo nəfəriku vey yəmənıj kışte, çandə 10 həzo nəfər zəxmin və çand milyon avarə bıən.
