Yəmənıjon tojə muvəffəğiyət, Səudiyə tankon kərvon məhv iyən tarmor bıə.
Yəməni rəket hissə, ərtışi artilleriya və muğavimət ğıvvon zinə şəv Ərəbistoni zəminədə bıə i qılə Səudiyə tank kərvoni məhv kardeşone.
Bə Yəməni Əlməsirə aqentiyəti raporti əsos, Yəməni rəket hissə, ərtışi artilleriya və muğavimət ğıvvon Ərəbistoni cənub, Nəcranədə Əlsədis hərbi bazə ğərbədə bə Səudiyə tankon kərvon həmlə kardeşone.
Yəməni hərbion ım zırehin qrupi barədə məlumat bə dast varde bəpeştə Ərəbistoni zəminədə bey hucum kardeşone.
Bə hərbi mənbəon elani əsos: ım həmləonədə, çand qılə Səudiyə hərbion həm kışte və zəxmin bıən.
Eyni holədə, Beyza ostani Ğaniyyə məntəğədə Yəməni hərbion əməliyoti cərəyonədə, Səudiyə mızdor və hərbiyə ğıvvonku çand nəfər kıştə bıən.
İjən Yəməni ərtış və muğavimət ğıvvon Yəməni paytəxt Səna ostanədə, Nəhəm şəhrıstonədə bıə Əriyah və Ələyaşat bandonədə bə Yəməni istefo doə prezident Əbde Rbbe Mənsor Hadi vabəstə bıə hərbion əməliyoti dəf və çand nəfər çı muzduron kışte ya zəxmin krdeşone.
Ərəbiston de Amerkə, İ Bıə Ərəbon Əmirəti və çand qılə co kişvəron 2015-nə sori Marti 26ku bə Yəmən həmlə və ım kişvəri zəmini, dıyo və həvoku mıhosirəş kardə.
Ərəbiston və çəy həmpeymonon təcovuz de tosə bə ısət 14 həzo nəfəriku vey yəməni şahrvandon kışte, dahon həzo nəfəri zəxmin və çand milyonon nəfəri avarəti bois bıə.
