Vilayəti: sionist rejimi bə Suriyə həmləon be cəvob nibəmande.

Beynəl xalğ koonədə İroni Yolə Rəhbəri məxsusə məsləhətçi təkidış karde: sionist rejim Suriyədə ıştə təcavuzkaranə həmlə və cinoyəton reaksiya bəvinde və Suriyə iyən Livani milləton bə ım rejimi hərəkəton mınosib reaksiya nışo bədan.

Bə İrna raporti əsos, Əli Əkbər Velayəti bə Rusiya Əlyom kanali votışe: sionist rejim rə məntəğədə ıştə cinoyətonku pəşimon bəbe.

Beynəl xalğ koonədə İroni Yolə Rəhbəri məslehətçi bə Suriyə iyən Livaniku İroni millət və dıvləti himoyəon işorəş karde və votışe: İron həmişə Dəmeşği dıvləti kənoədəy və İroni təsirinə koməkon bois bıə ta Suriyə mıstəğil və zumand bıbu.

Əv İroni prezidentəti bə Yaponiya səfər karde barədə həm votışe: İron və Yaponiya miyono bıə əloğəon kanti bə 90 sor çımiku bənav obqarde və 2 qılə kişvər həmişə siyasi, iğtisodi və mədəni çokə əloğəonışone.

Əli Əkbər Velayəti İron və Amerkə miyono məxfi muzakirəon rədış karde və təkidış ka: sanksiyaon ləğv bey bənav İron və Amerkə miyono hiç muzakirə əncom ni bəbe və İroni nəzəku ısət de Amerkə rəsmi şəxson hiç muzakirə vindemon ə be ni.