Şəhid Hac Ğasim Suleymani şəhodəti bəpeştə reaksiyaon.

İroni prezident Həsən Ruhani qıləy mesaji vasitə təkidış karde: qeneral mayor Hac Ğasim Suleymani şəhadət Amerkə vədə muğaviməti iradəon çand bərobər karde bois bıdə.

Əv ım terroristiyə həmlə məhkumış karde və votışe: şək ni İroni millət və məntəğə muğavimət cəhbə Amekə cinoyətkorə ğıvvonku ım dehəştinə hərəkəti intiğomi bəqəten.

İroni islamiyə şura məclisi rəis Əli Laricani və İroni məhkəmə təşkilati yol Seyed İbrahim Rəisi həm ımruj, İrağədə Amerkə cinoyəti məhkum kardəşone və ıştə mesajədə qeneral Hac Ğasım Suleymani şəhadət təbrik və təsliyət votışone.

İroni xarıci vəzir Muhəmməd Cəvad Zərif həm qıləy bəyaniyədə, Amerkə həvo bombardımoni vasitə İrağədə Hac Ğasım Suleymani şəhadəti, məntəğə və dınyoədə muğaviməti do zumandəti amil bə hisobış varde və votışe: de İŞİD, Ənnusrə, Əlğaedə və co terroristiyə qrupon mubarizə barədə meydonədə məntəğə vey məşhur və təsirinə şəxsiyət, qeneral Ğasım Suleymani şəhid və terror karde vey xətərnok iyən be məxə hərəkət be ki bıhranon icodəkəy.

İroni xarıci vəzarətxonə həmçınin ım terrori bəştə İronədə Amerkə mənafe hifzəkə İsveçera səfiri Vanqeş karde.

Əmmo İroni mudafiə vəzir qeneral Əmir Hatəmi ımruj təkidış karde ki rə Amerkə və sionist rejimi şoy vontion bə əzo əvəz bəkamon.

İroni sepah təşkilati sıxənəvot həm qeneral Hac Ğasım Suleymani şəhadəti təsliyət votışe və təkidış karde: Hac Ğasım Suleymani xoni intiğami bəqətemon qeneral Rəmezan Şərif votışe: ımruj sepah təşkilat və muğavimət cəhbə vədə tojə fəsl ojə bəbe.