İrağiku Amerkə hərbion bəpe xaric bıbun.

İraği i minə vəzir ım kişvəri parlament loyhə icra bey xoto, Amerkə xarıci vəziriku tələbış karde ki bo Vaşenqtoni hərbion İrağiku çoknə xaric bey barədə muzakirə kardero qıləy nımoyəndə təyin bıkə.

Bə İrib raporti əsos, Adil Əbdulməhdi de Mayk Pompeo telefoni rabitə cərəyonədə təkidış karde ki İrağ ıştə mənafe əleyh harcurnə hərəkət və əməliyaton məhkum kardedə.

Əbdulməhdi zinə bə Avropa i bemoni səfir Martin Hart həm votışe: dıvlət bəpe İraği parlamenti ğanuni icra bıkə və hukmən kişvəriku xarıci ğıvvon bey İraği hakımiyətədə mısbət təsironış bəbe boçi ki Bəğdad pidəşe oromə şərayetədə de dınyo kişvəron əloğə və rabitəş bıbu.

Zinə həmçınin İraği yolə mərcəe təğlid Ayətullah Sistani həm bəyaniyə vasitə həmmə siyasi tərəfonış dəvət karde ki de siyasi roon məntəğə bıhranon həl kardero cəhd kon.

Im bəyaniyədə ki Ayətullah Sistani nımoyəndə əvış zinə Kərbəlo cumə nımoji xotbəonədə hundış ğeyd bıə; əmniyyəti və siyasi bıhranon şiddətin bey, İraği daxıli koonədə xarıcion mıdoxilə ziyod bey bois bəbe.

Əv təkidış karde ki xarıcion mıdoxiləon vəy qətero bəpe İrağıjon de yande i bıbun.

İrağiku xəbə ome ki ım kişvəri Həşduş-şəəbi muğavimət qrup bə tojə həmlə və təhdidon ciddi reaksiya nışoş do və elanış karde ki ijən zumandə hozzoəti şərayetədəy.