Suriyə Ğamişliədə anti Amerkə aksiya.

Suriyə Həsəkə ostani Ğamişli şəhrədə anti Amerkə aksiya bərpo be, cəmaət Vaşinqtoni anti Dəməşğ sanksiyaon məhkum kardışone.

Bə İrib raporti əsos, Suriyə Ğamişli şəhri sakinon ıştə şuaronədə bə Suriyə milləti zidd Amerka Sezar nomo bıə sanksiyaon məhkumışon karde iyən kişvəri şimol şərğədə milləti nat-sərvəton ğarəti bənə dızdiyəti bə hisob vardışone.

Əvon təkidışon karde ki de həmməy siyasi, hərbi iyən iğtisodi təziğon vucudi ijən ıştə dəvləti kənoədə bəmanden.

Eyni holədə Suriyə və Rusiyı həm qıləy mıştərək bəyoniyədə Amerkəku tələb kardışone ki bə Suriyədə ıştə qıvoninə siyosəti dəvom nıdo və bə beynəlxalğ ğanuni ehtırom noe sayədə ıştə hərbiçionış Suriyəku xaric ko.

Im mıştərək bəyoniyədə 2 tərəf ki avarəon bəştə kə oqordoniye xoto məsuliyətone ijən təkid kardən ki Suriyədə Amerkə hərbiçion huzur milləti reni bois bədə.

Amerkə kanqres dəvardə sori dekabrə manqi 11 anti Suriyə Sezar nomo sanksiyaon təsdiğış karde ki çəy i minnə mərhələ ımsor, iyoli 17ku bino bıə.

Sezar pesoxtə bıə nohəxə ğanun Suriyədə dustə mıttəfiğə kişvəron obdonəkə fəaliyəton vədə maneoni icud karde bois bıdə.