Tırkiyə ijən Suriyə Həsəkə şəhri sakinon peşoməninə ovi ğətış karde.

Tırkiyə işğalçiyə ğıvvon sənibəton Suriyə şimol-şərğədə bıə Həsəkə şəhri sakinon peşoməninə ovi ğət kardeşone.

Bə Sana aqentiyəti raporti əsos, Tırkiyə işğalçiyə hərbiçion ijən zinə və dəvardə manqonədə çand minnə kərə Həsəkə şəhr iyən çəy ətrofədə bıə sakinon peşoməninə ovi ğətış karde.

Bə həminə raporti əsos, Tırkiyə hərbiçion ım şəhri Əlok məntəğədə bıə ov ərosnə mərkəzi tətil və çəy nasus və pompə təchizaton kokarde vəy qətəşone.

Suriyə şimol-şərğədə bıə Həsəkə şəhri Əlok məntəğədə bıə ov ərosnə mərkəzi çın şəhri əhali peşoməninə ovi yeqanə təminəkə vırəy.

Suriyə xarıci vəzarətxonə çı Tırkiyə ım anti bəşər cinoyətkaranə rəftori bə Suriyə millət iyən hakımiyyəti zidd bıə ko bə hisobış varde və de qıləy bəyoniyə vositə təkidış karde ki Tırkiyə rəsmən de ım siyosəti oviku bə ğəyri hərbion zidd bənə silah istifodə karde holədəy.

Tırkiyə Suriyədə bıə terrorçiyə quruponku qıləy əsli himoyə kardə kişvəre ki ısət ım kişvəri şimol məntəğəonış işğal kardə.

Suriyədə behron miladi 2011-ə suriku iyən çı sionist rejimi əmniyəti oqəte çərçivədə və de Amerkə, Ərəbiston iyən Tırkiyə terroristonku himoyəon vositə bino be.