İMT bə Təl-Əvivi tələb vığandəşe

Həni dıminə həftəy ki, sionistə rejim bə Fələstini məzlumə əhali divon qətedə, bəvon ıştə dini ayinon icra karde imkan dodəni.

İbə Milləton Təşkilati bə Bəşəri Huğuğon dair Komissarəti sıxanəvot Rupert Kolville izhar kardəşe, ki, bə nomoj votəkəson, iftori oj kardəkəson zor tətbiğ karde hiç qıley səbəbış ni. Bə ıştə huğuğonku dinc surətədə istifadə kardəkəson zor tətbiğ karde ğəbul nıbə koe. İsraili rəsmiyon bəpe bə sıxanə və qırdbemonə azadion əməl bıkardon. Ey de hırdənon ım curə munasibət ənəğəbul zınəşe ğeyd kardəşe ki, dastqir bıə əğılon bəpe təcili azad kardə bıbon.

Ali Rəhbər Ayətullah Seyid Əli Xamenei votəşe ki, çe sioniston Əqsa məçitədə, Ğuds və Fələstini co məntəğəonədə kardə həvəşiə cinayəton çe dınyo çəşi vədə vağeə bedə. Har kəs bəpe bəştə vəzifə əməl bıkardo, ım cinayəton məhkum bıko.

İroni Parlamenti spiker Məhəmməd Bağir Qalibaf`i bə İslamiə keşvəron , həmən bə İMT Sər katibi və kali dınyo devlətə rəhbəron muraciət kardəşe ki, sionist rejimi Fələstinədə kardə cinayəton vəy se ro səy nişon bıdon.

Beytul-muğəddəsi mufti Şeyx Məhəmməd Huseyn çe Ərəbiə Devləton Liqaku, həmən İslamiə Həmkarəti Təşkilatiku piəşe ki,  Ğudsi muğəddəsə ocəğon çe sionistə rejimi təcavuziku muhafizə karde ro bey əməli təzyiğon nişon bıdon.

Maide.az bə Fələstini WAFA xəbə aqentiyyəti istinadən məlumat doəşe ki,  sionist rejimi bə Ğəzza və İordani ğərb sahili məntəğəon həmlə nəticədə 29 nəfər şəhid bıə. Çəvonədə 9 kəs hırdəne. 788 nəfərən zəxmin bıən.

İbə Milləton Təşkilati Əmniyyətə Şura axır bə ğəror omə ki, Fələstini məntəğəonədə de sionistə rejimi vağeə bıə konfrontasiya muzakirə bıkardo. Bı həxədə APA xəbə pevolo kardəşe. Həmonə iclas çoşanbə ruji de Boku vaxti saat 17-də bino bənine.

İbrimi Zahirəddin. Çe Rusiya Yekaterinburğ şəhəriku. İİR sədo, tolışi radio.