De həzrət imom Muhəmməd Təği şəhodəti mınosibəti səbəsəloməti

Dınyo şiəyon 9 nə imom həzrət imom Muhəmməd Təği(ə) Cəvaduləimmə şəhodətə rujədə islamiyə İron bə matəməmədəy.

Imruj hicri ğəməri 1442 nə sori ziğədə 29 bərobər de milady 2021 minnə sori İyonə manqi 11 Həzrət imom Muhəmməd Təği(ə) şəhodəti sorəqardışe.

Həzrət imom Muhəmməd Təği(ə) hicri ğəməri 195 nə sori rəməzanə manqədə bə dınyo omə və ıştə əzizə dədə dınyo şiəyon 8 nə imom Həzrət imom Rıza(ə) şəhodəti bəpeştə mıslmonon imomət və rəhbərətiş bə qi qəte.

İmom Cəvad(ə) jimon və imoməti devran islamiyə tarixi inkişaf karde iyən islam dınyoədə bovəon və fəlsəfiyə fikon inkişafi əsr be.

De mıxtəlif məzhəbon alimon bəhs və munazirə icloson bərpo karde ,millət və məxsusən alimon təlim və tərbiyət doe iyən zəmonə hakimon bə insoni zid siyasəton oşko karde ,mincumlə həzrət imom Muhəmməd Təği(ə) elmi,mədəni və siyasiyə fəaliyətonku bə.

Xəbə omə ki İslamiyə ironi bəzi vırəonədə Həzrət imom Muhəmməd Təği(ə) şəhodəti sorəqardışə şəv və ruji matəmə mərasim de səhiyəvi porotokolon rioyəti bərpo bıə.

İron İslam Respublika telerədyo dınyo şiəyon 9 nə imom Həzrət imom Muhəmməd Təği(ə) şəhodəti sorəqardışi mınosibəti bə dınyo mıslmonon iyən ozodəti tələb kardəkəson səbəsəloməti dodə.