Hərəkəton-Nəzal nomo terroçiyə qurupi sərkərdə bəştə cinoyəton etirofış karde.
Hərəkəton-Nəzal nomo terroçiyə qurup sərkərdə cinoyəton təğib kardey 5 minnə iclosədə əv bə İronədə bıə ıəştə terroristi əmaliyəton etirofış karde.
Bə İranpress aqentiyəti raporti əsos, həminə iclosədə Hərəkəton-Nəzal nomo terroristi qurupi sərkərdə bə Həbib Əsivəd məşhur bıə şəxs, Fərəcullah Çəəb bəştə cinoyəton etirof kardey iclosədə votışe ki İroni nat şirkəti Çinıjə koəkəyon ın qurupi tərəfo dızdiyə bıən.
Həminə iclosi əvvələdə İroni məhkəmə təşkiloti nımoyəndə bəyonış karde ki: bə İfsode-Filərz mıthəm bıə şəxs Fərəcullah Çəəbde de Hərəkəton-Nəzal nomo terroçiyə qurupi pesoxte və əy idorə kardey vositə de İroni nizomi mubarizə bardey hədəfi İroni cənub Xuzıston ostanədə çandə terroristi əməliyotonış əncom doə ki beqınohə şahrvandon kıştey kənoədə umumi vırəon xərobəş kardə.
Əmin vəziri bə mıttəhəmi tərəfo bəyon bıə etirofon işorəş karde və votışe: ın şəxs de anti İron televeziya kanalon vositə daimən anti İron etosniye hərəkətonku filmon və şikilon muntəşir kardedə be.
İroni məhkəmə təşkiloti nımoyəndə təkidış karde ki mıttəhəm ıştə ittihomon ğəbulış kardə iyən votəşe ki cinoyəton anədə ziyod bey xoto anti İron əncom doə terroristi koon qırd elan karde əzı ni.
Əmin vəziri bə Həbib Əsivəd iyən çəy qurupi cinoyəton nəticədə İroni anədə şahrvandon kışte və zəxmin bey miğdori işorəş karde və çəy maliyə fəsodi barədə votışe: əv de Danimarka, Kanada, Almaniya, Beljik, Holləndiya, Avesteraliya, Tunis və İsviçədə bıə 9 qılə şirkəton vositə ıştə qırd maliyə fəsodinə koon əncom dodə be.
Hərəkəton-Nəzal nomo terroçiyə qurup sərkərdə Həbib Əsivəd cinoyəton təğib kardey 5 minnə məhkəmə islomi inğilobi 26 nomrə məhkəmədə ımruj bərpo be.
In terroristi qurup ki Əl-Əhvaziyə terroristə qurupi şobəy de silohin və terroçiyə əməliyoton vositə İroni Xuzıston ostani mıstəğilləti dumoədə be və çəy vey uzvon ısət Holləndiya, Danimarka və İsviçədən.
Fərəcullah Çəəb 4 sor çimi bənav Əhvazədə bıə terroristə əməliyoti hidoyət əkə be ki de İroni kəşfiyot məmuron mohrə əməliyoti vositə dastqir be və bəştə anti İron cinoyəton və bə Ərəbiston, israil iyən Amerkə amçilon vabəstə bey etirofış kardə.